نورهان البطريق تكتب : جيل العشرينات‎

بطاقتها مكتوب عشرين
ملامحها تقول ستين
تايهة بين الاتنين
في حيرة بين مريتها
و تاريخ ميلادها
وبذهول بتسأل نفسها
وتقول أنا مين؟ !

تحسبها بالسنين
ولا بالتجارب والهموم
تعدها بالمواقف وتحكي
كام مرة ضحكت لما اتباعت
واتسابت واتخانت
ولا تحسبها بالسكوت
كام مرة سكتت بعد كل خيبة
واتصدمت بعد كل مرة شعرت
فيها بالوجع والخذلان

كام مرة عدت عشان بتكره الفراق
عارفة نفسها فاشلة في النسيان
بتقاوم إحساس الهجر والبعاد
عارفة أنها بتردد علي لسانها الوداع
لكن من جواها عارفة أنه كلام
بتقنع نفسها أنها تقدر وحاجة
من جواها بيقولها بطلي أوهام
أوقات بتحارب عشان تخالف
مشاعرها وبتتظاهر بالجبروت
وبتقول لنفسها الكبرياء مطلوب
ابقي قوية واحتفظي بالثبات
تنفذ التعليمات لمدة ساعات
وبعدها ترجع اضعف مما كان
وفي النهاية صدقت أنها عايشة
بشخصتين ومستحيل تستغني
عن واحدة من الاتنين