اتخيل ابنك ف مكانى.. زجل: صلاح عتريس

اتخيل ابنك ف مكانى .......... صلاح عتريس
ــــــــــــــــــــــــــــــــــ
هو عشان ابنك
وف حضنك
يبقى خلاص تنسانى
زى ما حضنك
ضم كيانه
جرب مره تضم كيانى
زى ما كفك
يمسح دمعه
خلى الكف التانى عشانى
ما تسبنيش كده ليلة عيدى
او تنهيدى
ابات وحدانى
ما تسبنيش اطلع شرانى
علم ابنك
معنى الحب
ابنك عمره ما يبقى انانى
عمرك يوم ابدا
ما هتخسر
لو مكنتنى على احزانى
عمرك يوم ابدا
ما هتخسر
شوف كام حسنه
تاخدها ف شعرى
راسى قصادك
المس تانى وتانى وتانى
لو ما قدرتش تشعر بيا
لو ما قدرتش
اتخيل ابنك ف مكانى ..............................صلاح عتريس