EN 
أصيب الإعلامي حسام حداد، بفيروس كورونا هو وزوجته.
وكتب حداد على حسابه بـ ":إنستجرام" اتنين عندهم كورونا ومحجورين في البيت رجعنا على مصر بعد عملية يارا، قعدنا بعدها كام يوم ويارا جالها كورونا. اتحجرت معاها في البيت علشان أساعدها، بعد ٣ أيام اتعديت أنا كمان.أعراضنا متوسطة لكن متعبة جدًا، يارا في الأشواط الأخيرة من المرض وأنا أتمنى أكون عديت المرحلة السخيفة النهارده بعد ٣ ليالي من الحرارة وتبعاتها.
حكى الإعلامي حسام حداد معاناة زوجته بعد إصابتها بـ١٧ شظية في جسمها من انفجار صاروخ بالستي في باليمين وشرخ في الجمجمة وكسر في ٣ فقرات في العمود الفقري أثناء أداء عملها في بعثة الصليب الأحمر.
ونشر "حداد" صورة له مع زوجته من المستشفى وكتب":يوم جديد وأمل جديد وعملية جديدة النهارده.
يارا بتقول إنها السابعة وأنا بقول إنها الثامنة، مش فارق رقم العملية، المهم إنها ممكن تكون العملية قبل الأخيرة بعد أكتر من سنة ونص من العمليات الجراحية والعلاج بين بيروت والقاهرة وچنيڤ.
وتابع:"يارا قوية وصبورة وقلبها يساع الدنيا، من ساعة الإصابة اللي حصلت لها في قصف مطار عدن في ديسمبر ٢٠٢٠ ولحد النهارده، وهي مرت بكل صعب ممكن حد يتخيله، كم الإصابات الجسدية والنفسية وواقفة على رجلها وبتبني لقدام.
وأضاف:"يارا كانت مسؤولة الإعلام ونشر الوعي عن القانون الدولي الإنساني في بعثة الصليب الأحمر الدولي باليمن، يارا اختارت تكون شغالة في الصليب الأحمر الدولي عشان بتصدق في الإنسانية -اللي في رأيي خذلتها- ومساعدة الناس، فاشتغلت في اليمن ولبنان وسوريا والعراق وجنوب السودان وهي اللي اختارت كل الأماكن دي بنفسها وبطيب خاطر ورضا.
وأشار:"يارا، يوم ٣٠ ديسمبر ٢٠٢٠ كان آخر يوم ليها في اليمن، واتصابت في قصف مطار عدن بـ٣ صواريخ باليستية ومات ٣ من زملائها كانوا قدامها في طابور الجوازات في المطار.
ونوه:"يمكن دي أول مرة أحكي عن إصابتها -ومش عارف ليه دلوقتي باتكلم- لكن حسيت النهارده إني عايز أحكي عن زوجتي وعن قلبها اللي يساع الدنيا واستحمل كل اللي مر بيه.
وأوضح:"يارا كان عندها ١٧ شظية في جسمها من الانفجار وشرخ في الجمجمة وكسر في ٣ فقرات في العمود الفقري وجرح مفتوح في الرئة وكسر في عظمة الساق وقطع في عصب الساق أدى لفقد الحركة كاملةً في قدمها؛ وقدرت تتغلب على كل دا وتمشي وتتحسن وترجع لحياتها واللي بيحبوها ونتجوز ونعمل فرح ونرقص ونهيص.
واختتم :"يارا بطلة من اللي بيتعمل لهم أفلام سيما أمريكاني، يارا اللي جدايلها رابطين على قلبي.
