EN 
«300 ألف جنيه شقى عمري ضيعه جوز بنتي بعد ما ولع في الشقة اللى أنا مأجراها ليه».. بتلك الكلمات بدأت أم محمد السيدة الستينية حديثها في تصريحات عقب قيام زوج ابنتها بإشعال النيران في شقة ملكها بدمياط.
تفاصيل الواقعة
فتقول أم محمد": اللى حصل إن بنتي متجوزه من 4 سنين لجوزها اللى كان شغال منجد، وخلفت منه ولد وبنت لحد دلوقتى، ودايما بيعمل المشاكل معايا ويضربني بشكل مستمر ولم يراعي عمري الكبير في ذلك، وامه كمان لما بشتكيلها من أفعاله تضربني وتشتمني وتطردني من عندها".
شقى عمرى ضاع و300 ألف جنيه ضاعوا
وأضافت السيدة:"أنا كنت ماجره ليه شقة ومسجله العقد في الشهر العقاري لإثبات ذلك، ولكن لم أقم بأخذ منه أي فلوس نظير الإيجار، وأنا اللى صارفه على الشقة من الأبرة للصاروخ بدون أن يشارك فيه جهازها بشىء وصرفت عليها كل شقى عمري 300 ألف جنيه صرفتها وجهزت بيهم الشقة وأجرتها ليه دون مقابل وده علشان أسعد بنتي وأجوزها لواحد يضمن يعيشها كويس".
زوج بنتي ولع في شقتي وشقى عمرى ضاع
وأوضحت:" يوم الواقعة جالي زوج بنتي وساب بنتي وعيالها عندي ومشي، وبعدها بشوية كده بلغوني بإن شقتي بتولع، ولما روحت وشوفت الجيران عماله تطفي في الشقة، وشوفت أنبوبة البوتجاز الخرطوم بتاعها مقطوع في الصالة والناس قالوا إنه جوز بنتي هو السبب في إشعال النار في الشقة، ولما روحنا قسم الشرطة بنتي تنازلت عن المحضر ضد جوزها، ومشيوا علطول حتى أنا رفضوا يخلوني أتكلم عشان اتهمه".
بنتي أغمي عليه لما شافت النار والعة في شقتها
وأكدت:" جوز بنتي لما شافت النار في شقتها أغمي عليها ونقلوها لبيت أختها وبعد تنازلها عن المحضر، أخدها من عند أختها وأنا معرفش عنها أي حاجة لحد دلوقتى من ساعة ما مشيت مع جوزها، وأنا حقي ضايع ومش عارف أكلم مين وأجيبه منيني بعد ضياع شقى عمري في الشقة".
استغاثة للمسؤولين
واختتمت:" أنا هرفع قضية ضد جوز بنتي بعقد الشقة علشان أخد منه الإيجار اللى عمره ما دفعه علشان أرجع جزء من حقي، ويناشد كل المسئولين وبطالبهم وبستغيث بيهم علشان حقي يرجع".
