EN
أحيا محمد الدماطي ذكرى رحيل صالح سليم، رئيس النادي الأهلي السابق.
وكتب الدماطي، من خلال حسابه الشخصي على “فيس بوك”: “في ذكرى رحيل المايسترو صالح سليم، أفتكر يوم وفاته، رحنا المطار نستقبل الجثمان، وكان محدد الساعة تسعة الطيارة توصل، وحصل الخير ووصلت الساعة ١ بليل، كل دا وإحنا واقفين مع مجموعة من الجماهير مفكرناش لحظة نمشي، وتاني يوم حضرت الجنازة وبالليل رحت العزاء، أزحم عزاء رحته في حياتي، كان في مصطفى محمود وفضلت واقف ساعتين ونص في طابور عشان أخش”.
وتابع: “وقتها فعلا مكنتش أعرف بني آدم جوه النادي الأهلي ولا حتى كنت عضو جمعية عمومية، وعندي ١٨ سنة وعندي امتحان تاني يوم، لما واحد صاحبي كلمني بيقولي إنت عندك بتعمل إيه وبتعزي مين؟ إنت متعرفش حد أصلا، قلتله أنا بعزي النادي الأهلي، هي دي قيمة الرموز اللي خلقت شعبية النادي الاهلي، ربنا يرحمه”.
