EN
رنا إبراهيم تكتب.. قواعد التعايش كزوجة "1-3"
اتجوزتى ورحرحتى وحملتى وولدتى وبقى عندك كرش وجسمك باظ! ده مشكلة لجوزك ومآساة تتذلى بيها عمرك كله! هو بكرش مش مشكلتك..
الراجل اللى بكرش يسوى قرش. طبعا حتقعدى تسمعليك كلام على شاكلة.. إيه الكرش ده، انت تخنتى يا (بيبى)، مش لاقينلك فستان سواريه تلبيسية عشان تحضرى بيه فرح صحابنا.. وهكذا. ده غير طبعا نفسك الأمارة اللوامة اللى كل ماتقفى قدام المراية حتقعد تسبلك انك بقيتى تخينة ومش عارفة تخسى.
طيب عمرك فكرتى إنك فعلا لازم تخسى؟؟ مش عشان تخلصى من تريقة جوزك.. لا.. عشان نفسك. اه تصورى، نفسك! نفسك اللي بتضيع وسط زحام دور الأم والزوجة والمرأة العاملة.
مفكرتيش ترجعى كدة كام سنة لورا أيام ما كنتى بتعملى دايت عشان تبقى حلوة وتلبسى اللي نفسك فيه. أيام ما كنتى مقضياها سيزر سالاد و براون توست و تكتأبى لما تلاقى نفسك زايدة كام كيلو عشان عكيتى فى الأكل وانتى مسافرة مع أهلك الساحل؟
فكرتى تروحى الجيم؟؟ مش عشان تخسي (مع ان ده سبب من الاسباب) بس بدافع انك تطلعى الكبت و تحضرى كلاسات بيلى دانسنج وزومبا عشان تتبسطى ونفسيتك ترتاح وتبقى احسن.
خلاصة الكلام:
حبى نفسك وادفعيها انك تبقى اجمل.. مش عشان حد، عشان نفسك. انتى ليكى عليكى حق. ليكى حق تتبسطى و تفرحى وتشوفى نفسك جميلة. حتقوليلى و مين يشوف البيت والبيبى؟ حقولك انك انتى الدينامو اللى بيدى الطاقة الايجابية لكل اللى حاوليكى، لذا انتى محتاجة تحبى نفسك عشان تعرفى تحبى بيتك وجوزك والبيبى، محتاجة تشوفى نفسك جميلة عشان تشوفيهم جمال.
نصيحة:
خدى تريقة جوزك بطريقة ايجابية وخليها طاقة تدفعك عشان تبقى جميلة، لو مش فى عينه يبقى فى عينيكى وصدقينى بعد شوية حيشوفك اجمل واحدة في الدنيا
