بالفيديو والصور.. هاشتاج "ديزنى بالمصرى" يشعل تويتر وهنيدى يؤازر العرب فى إعادة دبلجة الكارتون

مغردو "تويتر" ينادون بعودة الدوبلاج المصرى لأفلام ديزنى الكارتونية
محمد هنيدى يدعم الحملة ويغرد :
"لما عملنا نسخة الأسد الملك وحققت نجاح ديزني بعتت لينا شكر خاص"
ارتباط اذهان الكبار والصغار بأشهر الجمل الكارتونية المدبلجة بالمصرى
العرب يؤيدون استخدام اللهجة المصرية فى دوبلاج الكارتون لبساطتها وسهولة فهمها للجميع
اعرب مغردو موقع التواصل الإجتماعى "تويتر" من المحيط إلى الخليج عن حبهم للغة المصرية التى تستخدم فى الدوبلاج على أفلام ديزنى الكارتونية الشهيرة والتى أوضحوا أنها تعطى مذاقا مميزا للكارتون وتجعل الأطفال ينجذبون بشدة إلى متابعة كارتونهم المفضل بتركيز واضح وذلك فى هاشتاج دشنوه وأطلقوا عليه "#ديزني_بالمصري" للمطالبة بعودة الدوبلاج المصرى لأفلام ديزنى والتى دعمها الفنان الكوميدى "محمد هنيدى" الذى اشتهر بدوبلاجه لكثير من الأفلام الكارتونية مثل "تيمون فى الأسد الملك"، و "مارد وشوشنى فى شركة المرعبين المحدودة"، و"سوبر هنيدى".
واحتل الهاشتاج مركزا متقدما فى التريند المصرى عبر "تويتر" فضلا عن تأييد العرب جميعا للغة المصرية فى الدوبلاج لسهولة كلماتها وألفاظها ومرحها.
واستعان الرواد فى الهاشتاج بسلسلة من الجمل الشهيرة التى ارتبطت بأذهان الكبار والصغار، والتى كان من أبرزها :

فيلم "الأسد الملك"
لما الدنيا تديك ضهرها....ادي ضهرك للدنيا

تيمون عمركش فكرت ايه النجوم الملعلطه ف السما دى.. بومبا انا مبفكرش بس ممكن يكون دبان دبان منور لازق ف السجاده الزرقا اللى فوق.
هاكونا متاتا حكمة نغمها لذيذ، هكونا متاتا.. انسى الماضي اللي يغيظ.
أنا زعلان وقلبي حزين.
اديله في مشمه، اديله على حنطور عينه.
دودة معتبرة ملظلظة بس تملى التانك.
كان نفسي أتنطط من الفرحة بس ضهري بيوجعني.
ياختي كميلة.. ماهووش ملك بس برضه أخلاق.
أنا مش بحذّر ولا بفزّر.
أنا محاط بشلة متخلفة.
مخاطر أنا بضحك فوش المخاطر هاها.
عمو سكر.. أنا لما هبقى ملك إنت هتبقى إيه هتبقى طيشة.

فيلم "شركة المرعبين المحدودة"

متهيألى جاتلى فكره احنا نستخدم معالق الشوربه ونحفر نفق بره البلد ونطلقها فى الخلا.
هتعزمني علي العشا فين الليلادي، حجزت في مكان غالي اوي اسمه كوابيس، كوابييس لكن دة الحجز هناك مستحيل، مش لكورتي البعبع.
ششششششش سامع الصوت ده دي رياح التغيير.. سامع ده سامع رياح العبط أما عبيط.
رجع البنت دي يا إما علينا العوض.
طوس في البشطة.. بوص في الشنطة.
أنا مش مصدق نفسي، أنا طلعت في التليفزيون.
بالذمة دا شكل واحد منفي دا.. المفروض يسموني المنفي الحبوب.. أو المنفي السعيد.
الموضوع ده ميتكررش.. أنا حطاك في دماغي وبراقبك وهراقبك.
وديتها فين يا محول يا ابو عين واحده؟..اول هام اسمها اعور، لما تحب تهزأني هزأني صح.

فيلم "حياة حشرة"
إنتوا أغبية حفارين في الطين اتخلقتوا علشان تخدمونا إحنا الجراد.
النمل مش خدامين عند الجراد.
راح فين أكلي.
هبار هبفشفش مامتي.
أيوة يا زعيم دول فسفس.
الحكاية مش أكل الحكاية تأديب النمل ده.

فيلم "الفأر الطاهى"
الاكل الحلو تدوقه زى المزيكا .. وتشمه زى الالوان، الخيرات متلتلة حواليك مطلوب منك بس تستطعمها.
بعد ما جبتك بيتي ووثقت فيك.. سرقت البيض.
عنوان موسيقي الطبخ للجميع .. واللي ألطف منه إن جوستوه شكله مصدّق.
لا لا لا ده شيء مرعب مش معقول.. ده كده هيبوّظ الشوربة ومفيش حد شايفه.
خلطبيطة بالصلصة.
لو ركّزت على اللي ضاع منك عمرك ما هتشوف اللي بيستناك.. شوف رزقك الدنيا واسعة.

فيلم "البحث عن نيمو"
ماتمشيش ، انا ماحدش فضل معايا كتير زيك كدة.
أنا لما بشوفك وببصلك بحس بأمان.. أرجوك مش عاوز الشعور ده يضيع مني.. مش عاوزه أنسى.
عوم واتمختر عوم واتمختر عوم عوم عوم .. عوم واتمختر.
أنا برانا في نهر الأمزون.
الحوض نضيف الحوض نضيف.. ملعون الفلتر ده.. ضاعت خطة الهروب.
كان في ودعة قابلت خيار بحر قالها لو خيروني مش هلاقي أودع منك.
بابا لازم نقول للسمك يعوم لتحت..سمعتوا ابني قال ايه : كلو يعوم لتحت..عوموا لتحت عوموا لتحت.

فيلم "هركليز"
مشهد مؤثر.. تعرفو من زمان اوي ماحستش بالحالة دي, من ساعة ما طاج المسقعة انحشر في زوري.
فيلم "up"
عارف إنت بتكلم بالقطارة إنت تحفة
إيه العمل دلوقتي يا إيللي.
شاور على قلبك.
هي أمريكا بس جنوبية.
النادي ده للأبطال مش لأي عيل لابس نضارة.
مساء الورود أنا اسمي رامز من مغامرين الكشافة بالكتيبة 41 بالفرقة العاشرة.

فيلم "حكاية لعبة"
إلى اللانهائية وما بعدها.
في تعبان في جزمتي.
مكتوب على علبتي 7 سنين فما فوق، تيجي تلعب فيا البنت أم رياله دي.
بصوووو برقص جوه العلبة.
إنت مجرد لعبة أطفال.
أنا أنا الصديق اللي بحق وحقيق قلبي صافي.

كما كتب الفنان محمد هنيدى عبر حسابه الشخصى بموقع التواصل الإجتماعى "تويتر" : "شاركوني على هاشتاج #ديزني_بالمصري بأكتر اقتباسات وجمل فاكرينها من أفلام ديزني دعما للحملة اللي تم اطلاقها امس..شاركوا بالجمل اللي فاكرها بالمصري، الافلام اللي عمرك ماهتنساها والشخصيات".
واضاف : "طب يا جماعة في حالة رجوع ديزني للهجة المصرية هكون من أول ناس ان شاء الله يرجعوا للدبجلة #ديزني_بالمصري".
وتابع : "استنوا دبلجة مقطع ليكوا هعمله لأحد المشاهد من فيلم inside Out بشكل غير رسمي لشخصية Fear
ونسميه خواف #ديزني_بالمصري".
واستطرد "هنيدى" قائلا : "من أحسن الأوقات طول فترة عملي كانت الفترة اللي قضتها في الدبلجة بداية من أفلام ديزني حتى سوبر هنيدي..الحملة مش لأفلام هنيدي مع ديزني .. شاركوا باقتباسات من كل أفلام ديزني باللهجة المصرية #ديزني_بالمصري".
كما دعم الفنان "محمد هنيدى" مشاركة الفنانة "عبلة كامل" فى الدوبلاج المصرى فقال "وبما ان Finding Dory هينزل خلال اسابيع فطبعا ماينفعش غير الجميلة عبلة كامل تعمله بالمصري #ديزني_بالمصري".
واستكمل "هنيدى" حديثه قائلا : "أمس تابعت الحملة ولقيت ان دول الخليج كلها والدول العربية بتطالب بده عشان كدة عايزين نوريهم ازاي الدبلجة المصرية علقت معاهم #ديزني_بالمصري".
وعن مشاركته فى دوبلاج فيلم "الأسد الملك" قال "هنيدى" : "لما عملنا نسخة الأسد الملك وحققت النجاح اللي حصل بعتت ديزني للمخرج سمير حبيب شكر خاص بسبب جودة النسخة اللي كان غير متوقع #ديزني_بالمصري".