هشام النعال يكتب قصيدة: اتفرج يا سلام ع الساسة يا سلام

اتفرج يا سلام
ع الساسة يا سلام
بيقولوا احلى كلام
للخاصة والعوام
صاحبنا اللى عامل ابو العريف
شاطر قوى فى التزيف
اصله ادارجى ومخه نضيف
وتملى قصده بيبقى شريف
بقدرة قادر يخلى الكلمة يجيلها نزيف
ويشوطها لواحد كمان حريف
يجيب الجون بدماغة تمام
اخر مهارة وشطارة والهام
اتفرج يا سلام
ع الساسة يا سلام
بيقولوا احلى كلام
للخاصة والعوام
عم يا سياسى
والله وجعت راسى
خلتنى فى القازوزة
وعقلى كله بلوظة
اشوف الكابوريا اضحك
واقول استاكوزا
والتفاحة فى ايدى تبقى موزة
عملتوا شغلة جديدة
ما فيهاش ولا جملة مفيدة
واللى كان منكم على الحديدة
صبح غنى بشكل قاسى
سيبونا يا عالم كفاية مقاسى
سيبونى اعمر ارضى بفاسى
خلاص كلامكم قطع انفاسى
كفاية عليكم كفاية حرام
الحقيقة معاكم بقت اوهام
اتفرج يا سلام
ع الساسة يا سلام
بيقولوا احلى كلام
للخاصة والعوام