أنا مين ... أنا إزاى

خناقات ومظاهرات واحتجاجات هنا وهناك لما الواحد مبقاش عارف مين عاوز ايه .. يا اخوانا يا اهل مصر حد يعرف انا مين .. انا ازاى انا مش عارفنى .. بجد انا مش عارفنى , كل اللى فاكره انى انا واحد مصرى بيحب مصر بجد ، كنت بحلم بالعدل والحريه والمساواه ، كنت بحلم انه ييجى اليوم اللى مرتبى يكفينى انا والعيال وام العيال ، كنت بحلم باليوم اللى ابنى يقدر يدخل اى كليه هو يريدها دون التقيد بالشروط التعجيزيه وحواجز الواسطة والرشوه والمحسوبيه ... لكن بجد انا مش شايف اى تغيير .. شايف الرشوه هيه هيه والحراميه فى المحليات نازلين هبش بل على العكس الهبش زاد والهبيشه زاد عددهم.... كله بيضرب فى كله ... نفسى اشوف فصيل او حزب او حتى شخص يحب مصر من اجل مصر لا من اجل التورتة والكعكة ..