نبروه بالدقهلية بلد «الفسيخ».. البائعون: الإقبال شديد وده «موسم رزق».. ومواطنون: بنشتري مهما السعر زاد.. فيديو وصور

• بائعو الفسيخ بنبروه: الإقبال شديد وموسم مش بنلاحق فيه
• مواطنون: بنشترى الفسيخ من أصل الفسيخ ومهما غلى هنشتريه

تعد مدينة "نبروه" بمحافظة الدقهلية من أشهر المدن التى اكتسبت شهرتها ببيع الفسيخ والإقبال الشديد عليه من محافظات متنوعة.

"صدى البلد" التقى بعدد من الباعة والمواطنين لرصد عملية الشراء والبيع ومدى إقبال المواطنين فى ظل ارتفاع أسعار السمك خلال الآونة الأخيرة.

يقول الحاج محمد الملاح "صاحب محل فسيخ بنبروه": "أنا وعيلتى وأجدادى من عشرات السنين وإحنا بنعمل الفسيخ وبنبيعه بيجلنا ناس من محافظات كتير وبيحبو الفسيخ أوى وكل سنة قبل شم النسيم بكام يوم ييجوا ياخدوه".

فيما قال محمد سيد "بائع "بلدنا نبروه من أشهر البلاد فى صناعة الفسيخ كانت البلد زمان بتعتمد على الزراعة واندثرت بعد كده وبقى صناعة الفسيخ هى مصدر رزقنا والفسيخ أسعاره زادت حاجة بسيطة بتبدأ من 50 إلى 100 والسعر حسب الحجم".

فيما قال رجب محمد أحد العاملين بمحل فسيخ "الفسيخ بيقعد تخزينه شهر ونص وحسب الصيف والشتا بيكون طول أو قصر المدة يعنى فى الشتا أطول من الصيف عشان بيستوى بسرعة فى الصيف.

أما سعيد محمد مهندس "فيقول أنا باجى كل سنة من الشرقية عشان اشترى فسيخ من نبروه الولاد عندى بيحبوه جدا وكل سنة فى شم النسيم بيستنوا الفسيخ بتاع نبروه بالذات وفى الأيام العادية بنجيبه من أى فسخانى عندنا بس فى شم النسيم ليه نكهة وطعم وشكل تانى".

أما عادل فوزى "تاجر ملابس "فيقول "الفسيخ ده أساسى فى شم النسيم وكل سنة بنجيبه من نبروه والسعر بتاعه لو وصل إيه هنشتريه برده جى عادة اتعودنا عليها ومينفعش شم نسيم من غير الفسيخ دنا بقيت اسميه شم الفسيخ عشان بتاكل فيه كمية تكفينا سنة".