أنا والمدام والحكومة

عزيزتي الحكومة ترددت كثيرا في افشاء سر من أسرار عائلتي خشية التعرض للمساءلة القانونية بتهمة إفشاء أسرار منزلية مقدرا انشغالك باستكمال إجراءات رفع الدعم في يوليو القادم للتخفيف من عجز الموازنة لكن مضطر أن أفصح لعلك تفاضلين بين عجز الموازنة ام عجز المواطن.

أسف يا حكومة هتكلم عن غلاء الأسعار اللي بياكل في جلدنا ولحمنا ومصمص دمنا .. أسف لأني بأكل ولادي رز نصه وأكتر شعرية .. وشوربه بالمرقة من غير فراخ ولحمة .. وفينو من غير جبنة.. وعيش حاف من غير غموس .. اما اللي بيقولو عليه محشي فلم نعد نحشي .. وذاكرتي اتمحي منها البشاميل والبوفتيك وجلاش ورقاق اللحمة والكوردن بلو .. حتي القطايف أسعارها خلتني مش طايق .. وعين الجمل و الجوز واللوز والفستق أسعارها بالجرام دمار.

وكيس الفول ب 2 جنيه بقي لحسة.. و الفلافل قرصها بقي بجنيه .. ولو عاوز شيبسي قرطاسك ميكفيش رغيف ..

والله أسف تحملني قليلا بس كيلو اللحمه بقي 150 يعني علاوتك المضروبة في 2 اللي هتتصرف في يوليو الحزين متكفيش كيلوهين .. حتي اللبن بقي نصه مغشوش بميه وب 13جنيها .. يعني العيال مش فاضل ليهم غير شربه الميه وبنقطها من الحنفية نقطة نقطة علشان الفاتورة متعديش وتخرب القرشين اللي فاضلين .. وان حد قال لي الجو حر والمروحة فين أقول استحملوا ممعاييش ل فاتورة الكهربا تضيع فيها العلاوتين ..

أقسم بالله أسف بس هجيب منين دا الجبنه براميلي ولا فيتا أوحتي اسطنبولي بقت الطاق طاقين وبخلي اللحسه منها تكفي العيال شهرين وحرمت عليهم يأكلوا من الطبق وعلقته في السقف يلحسوا في الهوا علشان المهية تكفي أول يومين ..ولو حد قال رومي ولا حلواني أديله جزمتين وأطيح فيه ببوأين وقول انت مجنون عاوز تخلص المهية أول يوم.. انت عارف الكيلو عدي ال 100 والمهية فيها كام مية يا مهبول ..

ويبقي يوم اسود يابشمهندس شريف اسماعيل لو المدام قالتلي عدي وهات فروج وأعدي علي الفرارجي ألاقي الكيلو ب 35 ليه بلاها فروج هو من غيره هموت ..

والواد محمود ابني الكبير عاوز بيبسي وشيبسي وبسكوت وشوكولاته نفسه يأكلهم قبل ما يموت بس أسعارهم غليت فوق المعقول ..ويقول لي طب مصاصة أمصمص بيها شفايفي يا بابا . بكام يا محمود بجنيه . ماشي وأمري لله ده في المسموح.

والمدام أوعي تنسي دوا الواد حمزة المولود والكشف عند الدكتور ده يوم بيبقي يا معالي الوزراء فيه الحزن باين علي الوشوش منين يا هانم دا الكشف عدي ال3 ميات ده لو دكتور عنده رحمة بالجيوب .. والدوا الدولال خلاه مجنون وأنا مش معايا بنكنوت

يا عزيزي استني لسه ما قولتش ليك عن الدروس والمس والمستر والمصروف دول لوحدهم ورب العزه كافيين من أول ما تقبض تقول اتصرف المقبوض وتمشي شايل بطيختك وجورنالك مهموم لحد ما تخبط في حنطور

معاليك رايح فين كلامي مضايقك ولا ايه طب هقولك فكر كده تروح عند الجروساري ( الخضاري يعني) وانزل ب100 أهيف ميجبوش بطيخه وشويه ليمون .. ترجع البيت مهموم ومجبتش طماطم ولا خيار ولا بطاطس ولا شطه ولا فلفل ما الجيب مفهوش دول أخر 100 وكان عندي أمل يكفوا بعد خامس يوم

دام حبكم لشعبكم علي طول .. لسة عندي امل ان رفع الدعم مش هتعملوه