غلاء الذهب يعصف بعادات زمان.. هدايا عيد الأم من غويشة وخاتم إلى خلاط ومفرش سرير

"كنا زمان بنجيب هدايا عيد الأم ذهب.. البنت تجيب خاتم لأمها او حماتها، والولد ممكن يجيب غويشة أو سلسلة، وبعد ما زادت أسعار الذهب شوية من كام سنة بقينا نجمع مع بعض ونجيب خاتم او غويشة وسلسلة، ولكن بعد ما زادت الأسعار لأكثر من أربعة اضعاف اللي كانت عليه.. بقينا منقدرش على الذهب".. تقول آمال محمد، ربة منزل.

بدائل شراء الذهب

تغيرت اتجاهات الأسرة المصرية فيما يتعلق بشراء هدايا عيد الأم، حسب حديث أمال "بقينا نفكر في بدائل نقدر عليها، سواء لبس او مستلزمات منزل، وبقالي كذا عيد أم بشتري اما عباية بيت او خروج بـ 200 او 300 جنيه بالكتير، أو كولمان او آيس بوكس، أو طقم كاسات، طقم صواني، طقم توابل، طقم قهوة، طقم شاي، مفارش سرير، وكلها حاجات سعرها لا يزيد عن 200 جنيه".

أجهزة كهربائية

فيما ترى ماجدة عبدالقادر، موظفة، أنها تضطر للادخار قبل موعد عيد الأم بشهور "اتعودت اجيب حاجة محتاجاها أمي، اللبس مش مفيد، يعني مثلا في عيد أم اشتريت لها خلاط وسعره كان حوالي ألف جنيه، وعيد ام اشتريت لها فلتر مياه، والعيد دا نويت أشتري لها مروحة، لكن الدهب منقدرش علي سعره دلوقتي، اللي عنده حتة دهب بيحمد ربنا".

قلة المجاملات

وترى ماجدة، أن فكرة المجاملات بين الأسر أصبحت محدودة "إحنا يادوب نجيب هدايا عيد الأم، لكن معدش فيه عيد ميلاد لحد او ولادة او سبوع ونشتري دهب زي زمان، الكل يا دوب مكملها بالستر".

أسعار الذهب

وشهدت أسعار الذهب ارتفاعا غير متوقع بجميع الأعيرة بعد انخفاضها، حيث سجل عيار 21 638.19 جنيه مصري ويعد عيار 21 هو العيار الأشهر والأكثر رواجًا بعمليات البيع والشراء بالأسواق المصرية، ويتبعه في الترتيب عيار 18 الذي سجل 547.02 جنيه مصري.

وترجع التغيرات بحركة أسعار الذهب إلي العديد من العوامل المحلية والعالمية ومنها سعر الدولار بالبنك والسوق السوداء وحالة العرض والطلب بسوق الشراء وسعر أوقية الذهب عالميًا.

عباية للأم

ويرى محمد متولي، موظف، أن هدايا عيد الأم أمر ضروري لكل أسرة، ولكن صعوبة الظروف الاقتصادية أدت لتغيير نمط وأنواع هدايا عيد الأم "كنا الاول نجدد ونشتري اجهزة كهربائية زي الغسالة او الثلاجة، ودهب سلسلة أو أسورة، لكن دلوقتي الوضع اختلف ، يادوب نقدر نشتري عباية او طقم سرير، مبقناش نعرف نحوش جنيه لبكرة، ومنقدرش منفتكرش هدايا عيد الأم".

قلة الإقبال

وبحسب كاميل مراد، صاحب متجر ذهب، فإن حركة الشراء لم تتغير خلال عيد الام "حركة الشراء مقتصرة علي المخطوبين لشراء الشبكة، او حاجات بسيطة، وأغلب الستات بتبيع الدهب او بتغيره، وقليل اللي بيشتري، وفيه دلوقتي ستات بتقسيط ثمن الذهب علي كذا شهر وفي الاخر تاخد الحاجة اللي عايزاها سواء سلسلة او خاتم او اسورة".

استغلال المخطوبين

فيما كشف مجدي حنا، تاجر أجهزة كهربائية بحي شبرا، أن الاقبال علي شراء أجهزة بعينها لعيد الأم، مثل الفلاتر والخلاطات والمكواة والمراوح والشوايات "أسعارها معقولة وفيها عروض التقسيط على 12 شهرا بدون مقدم، وخصومات تصل لـ 30 %، ودا بيناسب أغلب زبائن المحل، لكن نادر ما زبون يشتري ثلاجة او غسالة او تليفزيون لعيد الأم، وأغلب اللي بيشتروا في عيد الأم اجهزة كهربائية هما الشباب المخطوبين عشان يستغلوا عروض وتخفيضات عيد الام".

حجم الإنفاق

وخلال تصريحات صحفية، أكد خالد الشافعي الخبير الاقتصادي، أنه مع اقتراب عيد الأم، تزداد فيها حركة البيع والشراء، حيث وصلت فاتورة إنفاق المصريين علي شراء هدايا عيد الأم نحو 250 مليون جنيه العام الماضي.