د. محمد ماهر يكتب: آلام الكعب.. وخرافة الأملاح والنقرس

من أشهر الخرافات الطبية التى ليس لها أساس من الصحة هى ان الام الكعب سببها املاح ونقرس ولازم تاخد فوار.يمكن تانى أشهر خرافة طبية بعد(اضطرينا نضحى بالأم علشان الجنين يعيش).

 بتقفى كتير فى المطبخ فكعبك يوجعك.ولأنك مبتشربيش ماية كفاية وبتاخدى دوا ضغط فيه مدرات للبول فتعملى تحليل حمض البوليك بتاع النقرس فيطلع عالى حبة صغيرة.فيبص ليكى الدكتور بنظرة ثقة ويقول لك(يا مدام انتى عندك نقرس.داء الملوك.مبروك يامدام).

فتفرح المدام لأنه جالها حاجة من ريحة الملوك.ويفرح جوزها لأنها مش هتاكل لحمة وهتوفر تمنها لسجايره.لكن للأسف فرحتكم مش فى محلها.لأن حضرتك مش مريضة نقرس.

ألم أسفل الكعب ليه اسباب تانية مش من ضمنها النقرس.اشهرها التهاب اللفافة الأخمصية وهى مجموعة الأنسجة اللى بتربط الكعب بصوابع القدم نتيجة الوقوف الكتير أو الوزن الزائد أو الأحذية غير المريحة أو ممكن من غير سبب.ومع الوقت ممكن تتجمع أملاح الكالسيوم على منطقة الألتهاب وتكون الشوكة العظمية ويكون العلاج بارتداء أحذية مريحة مع كعب طبى مع مضادات الالتهاب، أو علاج طبيعى بالموجات التصادمية وفى حالة عدم الاستجابة يكون الحقن الموضعى للكعب او العلاج الجراحى فى الحالات الشديدة الغير مستجيبة.

أما النقرس فده أحد أشكال التهاب المفاصل بترتفع فيه نسبة حمض اليوريك (حمض البوليك) في الدم مما يؤدى إلى ترسب أملاح حمض البوليك فى المفصل وده بيسبب التهاب المفصل ونوبات آلام شديدة وحادة بيصاحبها تورم واحمرار وخاصة فى مفاصل اصابع القدمين وبالتحديد اصبع القدم الكبير بتستمر يوم او يومين وترتاح مع مضادات الالتهاب أو دواء الكولشيسين أو الكورتيزون وبعدين تتكرر على فترات متباعدة

وملاحظة هامة جدا.ارتفاع نسبة حمض البوليك مش معناها انك عندك نقرس ومش معنى ان عندك نقرس يبقى بالضرورة حمض البوليك عندك لازم يبقى عالى.التشخيص الإكلينيكى والفحص اللى بيقوم بيه طبيب الأمراض الروماتيزمية هو الأساس.

طيب أنا حللت ولقيت حمض البوليك(اليوريك أسيد) عالى.آخد علاج ولا ما أخدش؟

تاخد علاج لو عندك نوبات نقرص حادة ومتكررة (واللى شرط فيها التهاب المفصل واحمراره زى ما قلنا سابقا) أو عندك حصوات حمض البوليك فى الكلى أو الحالب أو عندك قصور كلوى بسبب ارتفاع حمض البوليك(مش قصور كلوى مصاحب ليه ارتفاع حمض البوليك) او عند أخذ علاج كيماوى للأورام كوقاية من الارتفاع الشديد فى حمض البوليك المصاحب لعلاج الأورام

ولازم طبعا ترجع لطبيب الروماتيزم أو طبيب الكلى أوطبيب الأورام وهو اللى هيحدد بناء على حالتك.

.