الإشراف العام
إلهام أبو الفتح
رئيس التحرير
أحمــد صبـري
الإشراف العام
إلهام أبو الفتح
رئيس التحرير
أحمــد صبـري

مروة نصر تكتب: التحرر من التعلق المرضي بالأشخاص والأشياء

صدى البلد

أتمني أن تقرأوا بقلوب مفتوحة وعقول مرنة... التعلق المرضي بالاشخاص والاشياء امر متعب جدا بيفعل وجعك بشكل دائم و فيها بيبان ضعفك اوي ،تشبثك بـ شخص معين وعدم قدرتك على تخطي ألم علاقتك معاه بيدمرك نفسيا وجسمانيا وبيأثر عليك في جميع نواحي حياتك، لانك للاسف بتحط حياتك كامله تحت تصرف الشخص ده بتسجن نفسك فيه وعاوز تسجنه فيك فـ السجان مش اكتر حريه من ضحيته.


القيد الـ بتحاول تكتفه بيه بيقيدك اكتر ما بيقيده.. لما بنفك تعلقنا بـ الاشخاص والاشياء اللي بنحبها فإحنا بنحرر نفسنا منهم وبالتالي بنسمح لنفسنا اننا نتحرك على طبيعتنا ونكمل حياتنا وطاقتنا اللي بتهدر عليهم بنقدر نحافظ عليها، وبنقتنع وقتها بكل حب ان لو كانوا لينا هيرجعوا تاني من غير اي وجع لينا او ليهم وان كان رجوعهم ضد مصلحتنا فـ هو كدة بيخرج من حياتنا من غير ألم التعلق الغير متوازن...


التحرر مش معناه اننا بنطرد حد من حياتنا لا ابدااا دا احنا بنجذب التوازن العاطفي المطلوب فـ الحب.. لما تتحرر من تعلقك هتحس انك كسبت نفسك وبتسمح للاشخاص والاشياء الافضل والاجمل للدخول لحياتك...


على فكرة احنا بنتحرر من احبابنا علشان يقربوا مننا اكتر، بمعني ان فيه اشخاص بتهرب من علاقتها بسبب تعلق الطرف التاني بيها بشكل مرضي ومخيف اللي بيكون سبب في طاقه سلبيه فظيعه في العلاقه بسبب كتر الشك والغيرة والقلق والحيرة والحب المبالغ فيه اللي مافيهوش اي توازن فيبدأ يحس انه بيتخنق في العلاقه دى وانه فاقد لحريته وبيشيل مسئولية كبيرة وبيكون الحل انه لازم يهرب ويخرج منها حتي لو كان بيحب الشخص ده.


وأحيانا بيكون العكس .. ممكن نكون في علاقة سامة مستنزفة لطاقتنا وقاعدين نتحمل في الاذي ونيجي على نفسنا ونسامح ونعدى بلا داعي طرف بيتعود يدى اوى والطرف التاني بياخد وبس ، كله بسبب التعلق ...


التعلق اللي بيزين لينا الضعف ويخلينا عايشين في الذكريات  ومستنيين رجوع المحبين واحيانا بنفضل نجري وراهم ونطاردهم علشان بس يرجعوا يكونوا معانا لاننا حاسين اننا مش عارفين نعيش من غيرهم، الخلاصة اي علاقة مش لاقي فيها الرحمة وبتحس فيها بالضعف او بتخليك تيجي علي نفسك وكرامتك ومش بضيف ليك ومش بتلاقي فيها تقدير واحترام لمشاعرك ووجودك، اخرج منها فورا طالما عملت اللي عليك وزيادة حبه كمان ..اتعلق بحب الله وحب نفسك واديها حقوقها، لان الحب تقدير اولا وماينفعش يكون من طرف واحد، الحب تبادل وان انعدم التبادل اختل الميزان، فـ بلاش تؤذوا نفسكم ولا تستهلكوا مشاعركم، اتخلصوا من كل اللي يفسد سلامكم الداخلي، علشان توصلوا لراحة البال والسلام، ثم الامان الامان الامان، لانه كلمة السر في الحب وهكررها تاني، الحب هو ان تختلف وتتفق وانت في امان من الالم والفراق.