EN 
نشرت مي محروس ابنة الفنانة الراحلة نادية العراقية تعليقا عبر حسابها على موقع التواصل الاجتماعى انستجرام تحتفل فيه بعيد ميلادها بطريقة مؤثرة بعد ايام قليلة من رحيلها.
وقالت مى محروس : "ماما أول عيد ميلاد ليكي متبقيش جنبنا ومعانا أكيد انتي دلوقتي في الجنة ومبسوطة مع الملائكة وتيتا وجدو واخواتك، كان نفسي أقولك كل سنة وانتي طيبة وأبوسك وأحضنك وأعملك مساچ زي ما كنتي بتحبي".
وأضافت : "والله يا ماما أنا مش مستوعبة إنك خلاص مشيتي وسبتينا من غيرك اتكسرنا من غيرك يا أمي، انا فعلًا مش قادرة أعيش من غيرك أنا عايزاكي وعايزة أشوفك بس عارفة إنه مينفعش لأنك عند ربنا الرحمن الرحيم وأكيد مبسوطة، شكرا يا ماما على كل لحظة عشتيهالنا وعلى كل لحظة ضحكتينا وطبطبتي علينا أنا بحبك أوي بجد يا روحي .. دايما كنتي بتحمينا وحتى لما مشيتي بتحمينا.. انا بحس بيكي حواليا وبحس انك بتطبطبي علينا الحمدلله ربنا مصبرنا بس احنا موجوعين أوي يا ماما محدش فينا مستوعب".
وأوضحت مى محروس : "احنا حاسين انك مسافرة زي كل مرة وراجعة تاني وسطنا، عمري ما كنت أتخيل اني هكتب كده ولا اني هحس الاحساس الصعب ده كنت دايما واثقة انك هتفضلي عايشة وربنا هيفتكرني قبلك بس ربنا أراد حاجة تانية الحمدلله،️ ماما الله يرحمك ويكرمك بجنته وسامحيني على أي حاجة كل سنة جاية وانتي في الجنة وبين ايدين ربنا بحبك وتعاليلي في الحلم أشوفك".
مي محروس تدشن صفحة لوالدتها
دشنت مي محروس ابنة الفنانة نادية العراقية، التى رحلت عن عالمنا منذ أيام، صفحة بعنوان "النفس المطمئنة" كصدقة جارية لروح والدتها، وطلبت من الجميع الدعاء لها بالرحمة و المغفرة.
وكتبت مي: "الصفحة دى صدقة جارية لأمى الحبيبة نرجو المشاركة عشان الناس تدعيلها دايما وتترحم على روحها الطيبة، وجزاكم الله كل خير ولا أراكم الله مكروها فى عزيز لكم.. الفاتحة على روح أمى فضلا".
وتوفيت الفنانة نادية العراقية، الاحد، بعد تدهور حالتها الصحية إثر إصابتها بفيروس كورونا.
وأعلنت ابنتها مي محروس ، الخبر عبر صفحتها الخاصة على موقع فيسبوك وقالت: "ماما انتقلت الى رحمة الله تعالى أرجو الدعاء لها وقراءة الفاتحة على روحها الطيبة إنا لله وإنا إليه راجعون ".
