هشام النعال يكتب :اوقات يا دنيا

اوقات يا دنيا بحس انى زاهد فيكى
واوقات بحس انى عايز اجرى عليكى
اتشعبط فى ديلك وامسك ايديكى
واوقات بتعصى عليا الف حواليكى
احيلك شوية وشوية ابوس رجليكى
مرة تدينى حنيه ومرات اهون عليكى
عايشك غناوى قايم نايم داير بيكى
وعلى القهاوى لسانى ما يبطل حكاويكى
وفى سكتى بتشدنى على البعد خطاويكى
اطاوعك ونهار ما اوفقك تكعبلنى بلاويكى
وبرضه ناوى اعيشك بكل ما فيكى
ومهما عملتى انا برضه شاريكى
ناوى اعيشك بهيه عشقكى المحال
اعيشك اكله ع الطبلية وسط العيال
اعيشك بسمة ندية وانا راحال
اعيشك رزية ودمك ثقيل
اعيشك اذية وهمك تقيل
اعيشك ناشفة وطرية
اعيشك شابة ووليه
اعيشك على اى حال
بس انتى ارضى عليا
وبصيلى نظرة دلال