EN 
عادل مبروك يكتب : يوميات زوج مهروس
يوميات زوج مهروس
الحلقة الثالثة
تأليف / عادل مبروك
حلقة 3 مشهد 1
ليل داخلي شقة حسن
الصالة..سعدية والاولاد يحملون الفوانيس ويلفون حول ترابيزة السفرة ويغنون حالو يا حالو بصوت مرتفع..مهند جالس وحيدا علي احد المقاعد..يخرج حسن من غرفته منزعجا..ينظر لزوجته والاولاد بتعجب ثم يسقط نظره علي مهند..يتجه اليه ويحمله
حسن..والله مافيكم حد عاقل وهادي غير الواد مهند..ايه الزيطة اللي انتم عاملينها د ي
الاولاد.. بنلعب يا بابا
حسن..ومش بتلاعبوا مهند معاكم ليه
حبيبة تاتي مسرعة لحسن
انا اقولك يا بابا..اصلي ماما خدت الفانوس بتاع مهند وبتلعب بيه
حسن.. وانتي عملتي ايه
حبيبة.. ولا حاجة..قولتلوا اقعد هنا ولما بابا يصحي يشتريلك فانوس جديد واقنعته
حسن.. اقنعتيه بايه
حبيبة.. انه يقعد
مهند باكيا
ماليش دعوة انا عايز فانوس
حسن..اقنعتيه..ها
حبيبة..وانا مالي..
حسن لسعدية ممكن ترجعي الفانوس للولد يا سعدية هانم..
سعدية هاتلي فانوس وانا ارجعله فانوسه
حسن انتي مش عايزة فانوس..انتي عايزة علقة سخنة
سعدية صارخة.. شاهدين يا ولاد..ابوكوا عايز يضربني
حسن..صبرني يا رب..للاولاد
ذاكرتوا وعملتوا واجبكم ولا لسة
الاولاد..نذاكر ايه يابابا
حسن..تذاكروا دروسكم
حبيبة..دروس ايه يابابا..احنا ف رمضان..انت ناسي
سعدية طب والله انا لو مسئولة كنت الغي المدارس في رمضان..
حسن.. وتلغيها ليه يا ست المسئولة
سعدية.. هما العيال هايصوموا ولا هايذاكروا ولا هايلعبوا..مش لازم يفرحوا بالشهر الكريم
احمد.. يابابا انا كل يوم المستر يدخل الفصل ويقفل الباب
حسن باهتمام وبعد ما بيقفل الباب بيحصل ايه
احمد..ولا حاجة
حسن ..يعني ايه ولا حاجة
عبدالرحمن.. انا اقولك بيعمل ايه بعد مابيقفل الباب بس ماتقولش لحد
حسن بقلق.. هي وصلت لماتقولش لحد
حسن وسعدية ينظران بتعجب وقلق ويقتربان من احمد وعبد الرحمن
سعدية..قولي يا احمد..ايه اللي بيحصل ومش عايزنا نقوله لحد
حسن.. قول وماتخافش
احمد خائفا..هاقول وامري لله..المستر بيدخل الفصل وينام
ويقولنا مش عايز اسمع صوت..انا صايم وتعبان وعايز انام
حسن متعجبا.. بس كدة.
سعدية متعجبة.. بجد
حسن.. وبيقفل الباب وماتقولش لحد..ده انا بطني كركبت يا همج..يلا خش ذاكر انت وهو وهي
سعدية.. هو ايه اللي يخشوا يذاكروا ده..امال مين الي هايجهز معايا الفطار..ده انا صايمة وتعبانة
حسن هو انتي لسة ما جهزتيش الفطار..ده فاضل ساعة ع المغرب
سعدية.. وانا هاعمل ايه..مش كنت بالعب مع العيال
حسن صبرني يا رب
سعدية تغمز بعينها للاولاد
الاولاد عايزين نفطر دليفري يا بابا
حسن دليفري ازاي يعني
حبيبة انا عايزة بيتزا سوبر سوبريم
فؤاد وانا عايز بيكاتا بالشمبنيون
حسن لاحمد وعبد الرحمن ومهند
.. وانت تحبوا تفطروا ايه
مهند..انا عايز كوكو مشوي
احمد وعبد الرحمن.. واحنا عايزين شاورمة
حسن.. اكيد امكم هي اللي ورا المؤامرة دي
سعدية.. ماتجيبلوهم اللي هما عايزينه..العيال صايمة وتعبانة
حسن ..انتي بتصغريني ادام العيال يا سعدية يا نكدية..طيب..انا هاجيبلكم كل اللي انتم عايزينه
يخرج الموبايل من جيبه
الو..ايوة يا حج مسعد..معلش بس عشان المدام ما عملتش فطار النهاردة..ممكن اطلب اوردر..ربنا يخليك..عايزك توضبلي بتلاتة جنيه فول محبش وبتلاتة جنيه طعمية مقرمشة..اه رمضان بقي وصيام..كل سنة وانت طيب..سلام
سعدية والاولاد يتبادلون النظرات في تعجب
حسن ينظر اليهم وعلي وجهه علامات النصر
سعدية.. طب انا داخلة المطبخ احط الفراخ تتشوي
حبيبة.. وانا هاطلع صنية المكرونة من التلاجة تسخن
فؤاد لحبيبة.. خدي معاكي حلة المحشي سويها..ده ورق عنب بموت فيه
حسن.. وانا هاعمل طبق سلطة يهبل
احمد ومهند.. واحنا هانقوم نلعب بالفوانيس
حسن يضحك بهيستريا
سعدية.. ماتنساش تكلم الحج مسعد يسك ع الطلب
حسن.. لا ماتخافيش..الطلب ده للسحور
سعدية.. طب انزل هات شوية كنافة وحلويات للولاد..دول صايمين وتعبانين طول النهار..وما تنساش تجيب الزبادي..واعمل حسابك في ناس معزومين عندنا بكرة ع الفطار
حسن.. ناس مين يا فقرية
سعدية.. انت نسيت
حسن..مانتي من كتر طلباتك نسيت نفسي..مين اللي معزوم ع الفطار
سعدية..انت ناسي انك عزمت اخواتي وولادهم يفطروا معانا بكرة
حسن..اخواتك وولادهم..وطبعا اجوازهم..دول يجي عشرين نفر..وبعدين انا مش فاكر اني عزمت حد
سعدية..مانا عزمتهم بالنيابة عنك..وبعدين دي مرة في السنة
حسن..مرة في السنة بس عايزة مرتب سنة.
حسن..صبرني يا رب
نهاية الحلقة
