أكذوبة اكتشاف الغاز.. أسامة كمال يكشف تاريخ فضائح أردوغان في البحر المتوسط

وقال كمال، في برنامجه «90 دقيقة»، المذاع عبر شاشة «المحور»، مساء اليوم الأحد، :"طلع الرئيس التركي الإردوغان وعمل بروموشن وقال فيه أخبار سعيدة ومن الاربع للجمعة كتر الكلام عن اكتشاف غاز مهم فى البحر الأسود بكميات كبيرة جد كبيرة ع الآخر وعشان محدش يفهم غلط، كل خير يدخل لأى شعب فى كوكب الأرض يا ألف أهلا وسهلا إنما لما تكون متعود تسمع أكاذيب من حد أكيد هتدور وراه".

وأضاف مقدم برنامج «90 دقيقة»، :"ان قصة غاز البحر الأسود مشكلتها أن مصدر القصة هو إردوغان شخصيا أو حد من رجالته ومفيش طرف تانى، شريك أجنبى أو مصدر محايد فى القصة اللى مش محتاج أقول إن إعلامه وإعلام حبايبه فتحوا ع الرابع وحلقات فى الجزيرة عن الكشف العظيم اللى قالوا إنه يكفى احتياجات تركيا 20 سنة".

وتابع الإعلامي، أنه :"نمشى واحدة واحدة، الإردوغان طلع يقول اكتشفنا حقل غاز ضخم في البحر الأسود فيه 320 مليار متر مكعب، وناويين نوصله للمستهلك في 2023.. وسفينة الاستكشاف "فاتح" قالوا إنها بدأت مهمتها الشهر اللى فات، يعنى من شهر بس في منطقة "تونا-1" على مسافة 100 ميل بحري شمال الساحل التركي".

وأكمل أنه :"روسيا اليوم كانت نشرت يوم 11 إبريل إن تركيا سحبت سفينة الفاتح من المتوسط وهتروح البحر الأسود، بعد أقل من 5 أشهر من توقيع اتفاق حدود بحرية مع الوفاق للتنقيب قرب سواحل ليبيا ونشروا فيديو لسفينة راسية قرب سواحل اسطنبول"، متابعا أنه :"روسيا اليوم نقلت عن فؤاد أقطاى نائب الإردوغان إن سفينة تنقيب رابعة اسمها أوروج ريس في طريقها للمتوسط طب هي فاتح فين يا حاج فؤاد؟ هل هي حسب كلامك من عشر أيام قدام قبرص وللا زى ما قلتوا من 4 شهور اتسحبت وراحت البحر الأسود وشغالة هناك؟وللا زى ما بيقولوا الكداب نسّاى".

وتساءل الإعلامي، "ازاى فاتح لقت غاز فى شهر واحد بس ومين قدر الإنتاج الموجود؟ هل عندك خبرات كفاية؟ العالم كله عارف أن الدنيا ضيقة قوى فى موضوع التنقيب ده، وقبل ما أقول العالم رأيه آيه فى الكلام دة إن البحر الأسود مساحته تقريبا نص مصر وأقصى عمق فيه 2,212 متر، وتركيا مش لوحدها ع البحر ده".