EN 
شن بكري سليم المدير التنفيذي لنادي مصر للمقاصة هجوما حادا على ماجد سامي رئيس نادي وادي دجلة بعد تصريحات الأخير.
وقال بكري في تصريحات لبرنامج "الماتش" الذي يقدمه الإعلامي هاني حتحوت عبر شاشة "صدى البلد" كنا في يوم من الأيام بنحترم هذا الرجل، الكلام اللي قاله ده يتحاسب عليه، وكان الأولى أنه يكون عنده جرأة ورجولة يعلن اسم النادي".
وتابع "ماجد بيقول كلام مالهوش أي لازمة، كوكو واوا ايه الي بتقوله؟ هو في رئيس نادي يقول كوكو واوا؟، كنت مع معالي وزير الرياضة النهاردة ومعايا وليد هويدي واشتكيت له".
وواصل بكري "اتهامات غير محترمة من رجل مسئول، ياريت يكون عنده شجاعة أدبية ويقول يقصد إيه، نرفض هذا الكلام شكلًا وموضوعًا، احنا مش بنغلط في حد ولينا أنياب ونقدر نرد على ناس مش في وعيها، ردنا عليه هيكون قوي".
وأضاف "المفلسين الي اتكلم عليهم دول شرفاء ولهم مواقف محترمة، إحنا نادي وطني ولما لقينا نادي الإسماعيلي النادي الكبير والعريق في أزمة تنازلنا عن الجهاز الفني بالكامل، ده الطبيعي من نادي وطني زينا".
وأردف "المفروض ماجد سامي يشوف نفسه الأول، هو بيقول كلام مالهوش لازمة، واللي يتكلم علينا يترد عليه الصاع صاعين".
بكري سليم واصل تصريحاته قائلًا "ماجد سامي لازم يقف معووج ويتكلم عدل، لما يتكلم عن نادي ماسكه ناس شرفاء، لو أي نادي تاني غير المقاصة تعرض للظروف دي كان هبط، احنا بنصرف من جيبنا مال حلال محترم، مينفعش يطلع يغلط بألفاظ يقول كلام يعاقب عليه قانونًا، المفروض يبقى راجل محترم ويقول انا اقصد نادي مصر للمقاصة".
واستمر بكري سليم في تصريحاته "ماجد سامي لازم يروح يشوف ناديه بدل ما يتكلم عن نادي الأسياد والشرفاء، البعض بيقول اننا بنتفاوض معاه لإدارة المقاصة؟ ازاي نتفاوض مع واحد فاشل مع ناديه؟ هذا كلام غير منطقي".
واختتم بكري سليم تصريحاته "نمر بضائقة مادية وطلبنا من الوزير سلفة احنا مش رايحين نشحت منه، هو بيساعدنا زي ما بيساعد باقي الأندية، في ظرف اسبوع او 10 ايام هتروح الغمة ".
