EN 
دخل الفنان محمد هنيدى فى مناقشة مع جمهوره عبر صفحته على موقع التواصل الاجتماعى فيسبوك حيث وجّه له الجمهور عدداً من الأسئلة والتى قرّر أن يجيب عنها بطريقة كوميدية.
وكان أول هذه الأسئلة عن الموهبة التى كان يرغب فى تقديمها بعيدا عن التمثيل ليرد محمد هنيدى قائلا : "رابر.. وفيه تراك قريب هدس فيه السين كله من أول مروان موسى لـ أبيوسف"، مؤكدًا أنه يحب مطرب الراب شاهين قائلاً: ومش هقرب لشاهين عشان شاهين حبيبي".
كما وجه أحد متابعيه سؤالا عن قصر قامته ورد عليه محمد هنيدى بطريقة كوميدية حيث قال : "في الصيف بيوصل لـ 199 .. في الشتا بكش شوية ويمكن الناس واخده فكرة غلط عني بسبب أن كل أعمالي بصورها في الشتا".
وأضاف محمد هنيدى: السبب الحقيقي وراء قصر القامة ساخرًا: "زمان كان نفسي أبقى ضابط وقبل اختبارات الكلية رحت جيم جنب البيت.. الجيم كان معمول في الشارع وكان عم سعد المدرب ربنا يسامحه بيشيلني أوزان تقيلة أوي وأبويا كل ما يعدي علينا يقوله حرام عليك الواد مش هيبان من الأرض، وعم سعد يقوله أنا عارف أنا بعمل إيه، وأنا أقول لعم سعد سيبك منه أبويا متغاظ عشان أخيرًا هكسر سلو العيلة وهبقى أول واحد طويل في العيلة، المهم جيت اختبارات الكلية وعم سعد اقنعني أني بقيت طويل جدا.. والمشكلة أني ماكنتش بشوف أي بشر غير عم سعد فمكنتش عارف أطوال البشر وصلت لفين، لغاية يوم التقديم لما رحت الاختبارات ورفضوا يدخلوني وقالولي مفتحناش التقديم لخريجي الابتدائية".
ورد محمد هنيدى على سؤال آخر بشأن شعوره بالنجومية : "كنت عامل دور زمان أوي أول ماطلعت في مسلسل ومشهدي اتعرض وبعديها بيومين كدة كنت واقف على البحر في اسكندرية ولقيت واحد بكاميرا جاي ويقولي لازم أخدلك صورة وعينيه مليانه فرحة، افتكرته معجب أو صحفي وعايز ياخدلي فوتوسيشن ولمدة نص ساعة قعد يصورني على البحر وبعدها بيديني الصور قولتله أنت بتدهملي ليه ما أنت اللي هتنشر في المجلة هي مجلة ولا جرنال؟ شوية ولقيت كل صحابه متجمعين حواليه، طلع مصور متجول على البحر وحلف ما يمشيني إلا مادفع 20 جنيه، أديته الساعة والشبشب ورجعت عند خالتي الساعة 2 بليل حافي عشان متسألنيش وديت الشبشب فين".
