EN 
قدم المواطن ياسين سيد حسين استغاثة لموقع “صدى البلد” يستغيث فيها من مستشفى حورس بمركز أرمنت جنوب غرب الأقصر.
وجاء فى نص استغاثته: "أنقذونا من مستشفى حورس بمحافظة الأقصر في مركز أرمنت ، فشل في الأطباء والإدارة، كل الناس داخل المستشفى بتستغيث ومفيش حد سامع صوتها، رجاء أنقذونا".
وأضاف فى استغاثة: "أنا بنتي وقعت على دماغها رحت المستشفى قابلني دكتور الطوارئ قالي لازم تعمل سونار، قلنا ماشي، رحنا لأشعة السونار أخدنا 3 ساعات علشان نبعت لدكتور السونار علشان يشوفها، ولولا رحنا لنائب المدير بعد البحث عنه، حتى نزل إلينا دكتور السونار، وبعد كدا روحنا لدكتور تاني فى الطوارئ قال لا دي المفروض تعمل أشعة مقطعية على المخ، قلنا ماشي، رحنا عملنا أشعه مقطية على المخ وأخدنا 3 ساعات تاني علشان نلاقى دكتور المخ والأعصاب علشان يبص على الأشعة، والبنت عماله ترجع وتترعش معانا، ودي طفلة عندها 5 سنين، وبردو لولا رجعنا إلى نائب المدير علشان يبعت لدكتور المخ والأعصاب وبعد ما الدكتور بص عليها قال فيها تجمع دموي على المخ ولازم تتحجز 24 ساعة تحت الملاحظة".
وتابع: "وقال لازم تاخد محلول وأمبول الترجيع في الهول لحد ما يجهزوا الغرفة، روحنا الهول الممرض اللي هناك يقولي لما يفضالها مكان، طيب دي طفلة صغيرة ولا أكلت ولا شربت من الصبح، إديها المحلول لو على كرسي، لا لما يفضالها مكان، طيب ماشي، اتحجزت وده كان وقت دخولها الساعة 5 مساءً للمستشفى، ودخلت الغرفة الساعة 12:30 بالليل وعملت أشعة تانية الساعة 6 الصبح علشان يبص عليها تاني الدكتور، كانت الساعة 7 مساءً بعد ما راحت الممرضه تاني لنائب المدير علشان يبعت الباشا دكتور المخ والأعصاب، طيب دي طفلة صغيرة قدر الله وما شاء فعل، لو حصلها حاجة هيبقى مين المسئول غيابا عن مدير المستشفى اللي مشفنهوش خالص، ودي حالة من وسط كام حالة بتدخل المستشفى، والمستشفى دي بيدخلها كام حالة، الرجاء أنقذونا رحمكم الله".
