الحضن اللي إحنا شايفينه .. إعلامي يفتح النار على محمد رمضان |فيديو

فتح الإعلامي محمد موسى، النار على الفنان محمد رمضان، بسبب ظهوره وهو يحتضن فتاة إسرائيلية بملابس البحر أثناء حفله الجديد في اليونان.

وقال محمد موسى خلال تقديم برنامج "خط أحمر" على قناة الحدث اليوم، "من وقت ما طلع محمد رمضان وهو بيقول على نفسه نمبر وان .. ورغم إنه يقصد إن نمبر وان كممثل .. لكنه نمبر وان فعلا لكن في الأزمات والمشاكل.. كل شوية نسمع عن قصة لمحمد رمضان .. مش عارف لغاية إمتى".

تابع، محمد رمضان واخد علقة سخنة من السوشيال ميديا بعد صورة له على أحد شواطئ اليونان مع "مايا زخاريا" ودي مجندة إسرائيلية سابقة، مضيفا: "البنت حاولت تدافع عن محمد رمضان وقالت إنها طلبت تتصور معاه وإنه مكنش يعرف إنها إسرائيلية.. لكن أنا مش مقتنع بالكلام .. وأبسط دليل هو الحضن اللي إحنا شايفينه ده.. افتكر يعني التلامس بالشكل ميدييش إيحاء إن الصورة بين فنان ومعجب .. لا دول أكيد عارفين بعض كويس.

استطرد، دي مش أول صورة لمحمد رمضان .. قبل كده اتنشرت له صورة مع المطرب الإسرائيلي عومير ادام.. وبالمناسبة وقتها برضه اتعرض لهجوم حاد جدا من السوشيال ميديا.. وكانت النقابة وقتها قررت إيقاف محمد رمضان.. واضح كده إن محمد رمضان مغرم بالإسرائيليين.

وطالب الإعلامي محمد موسى، الفنان محمد رمضان بالاعتذار للجمهور بعد ظهوره وهو يحتضن فتاة إسرائيلية بملابس البحر أثناء حفله الأخير في اليونان.

وقال محمد موسى، "كان ممكن محمد رمضان يطلع يعتذر للناس اللي استفتزتها الصورة دي.. لكن رمضان مش بتاع اعتذارات.. لكنه لما رجع من اليونان نشر فيديو لأغنية بلادي بتاعة العندليب الأسمر عبد الحليم حافظ .. الناس مش منتظرة اعتذار من رمضان .. الناس عاوزاه يركز في الفن وكفاية جدل ومشاكل واستفزاز للناس".