EN 
بعد 26 يوم زواج رفعت عروس شابة قضية خلع على زوجها مشاركة مختصر قصتها المأساوية على أحد جروبات مواقع التواصل الاجتماعي لتحذير الفتيات من الوقوع في أخطاء مثل التي ارتكبتها في التعامل مع خطيبها وزوجها فيما بعد، معلقة: «دي مختصر قصتي واللي غلطت فيها علشان ما تقعوش في اللي وقعت فيه».
5 أخطاء دمرت حياتي
وقالت العروس الشابة: «مبدأيا كدا اتخطبت يوم 12- شهر 11- سنة 2021م لواحد ما اعرفوش قبل صالونات يعني: جه اتقدم ووافقنا عادي اتخطبنا وحبيته واتعلقت به جداً، لكن أول غلطة ارتكبتها: إننا لازم نسأل عنه كويس جداً جداً».
وأضافت العروس الشابة: «ثاني غلطة ارتكبتها: إن المفروض إنه البنت في فترة الخطوبة يكون فيه شخص ولو واحد فقط من أهلها فقط عارف بالمشاكل بينها وخطيبها علشان يفهموا شخصية اللي قدامهم كويس، ودا بقوله لأني كنت ما بوصلش لأهلي أي مشكلة بتحصل بينا كمخطوبين ابدا».
وعن نوعية بعض المشاكل الواقعة بين المخطوبين، أوضحت الشابة المكلومة ثالث خطأ ارتكبته من وجهة نظرها: «كنا كل لما بنخرج يأخد مني أي فلوس بحجة إنه حالته المادية صعبة، وفعلا كنت بسد له وكنت بشحلنه وأعمل له أي حاجة علشان ما يحسسش إنه ظروفه أقل مني، ودي ثالث غلطة) لأني كنت فاهمة إني لازم أقف جمب خطيبي وكدا وطبعا ما فيش الكلام دا».
خوفت أخذ لقب مطلقة
وتابعت العروس الشابة عن رابع خطأ ارتكبته: «هجري بالأحداث شوية: اتكتب كتابنا يوم 19- شهر 2-2022م، وهنا اتسرعت ومن هنا ابتديت المشاكل، فلاقيته مش عاوز يديتني فلوس للكوافير ولغيت الفرح علشان ظروفه اللي هو بيقول إنها صعبة واللي مع الوقت اكتشف العكس، علما إنه عملت حاجات كتير أوي علشان الموضوع ما يبوظش وطبعا علشان خوفت من كلام الناس إني أخد لقب مطلقة».
وواصلت العروس الشابة في سرد بدايات قصتها المأساوية: «اتجوزت يوم 3- شهر 5- 2022م، وطبعا في حاجات مش بحكيها لأني حساها مش أهم من اللي بحكيها بعد الزواج، قعدت أول 3 أيام زي كأننا عايشين مع بعض زي الأخوات، وللأسف ما كنتش فاهمة حاجة لحد ما مامته جات لينا ثالث يوم، ونيتها تأخدني لدكتوره علشان تعمل لي جراحة بديلة لعدم دخوله بي».
عشنا مع بعض أخوات
واستطردت الزوجة المكلومة: «رفضت تماما فضربني وبهدلني، ووبعدها لما لقاني هتصل بوالدي يجي يأخدني: فضل يصالحني لحد ما عديت الموضوع، قالي تعالي نروح للدكتوره علشان نديكي فيتامينات ونطمن وكده، والمهم بعد محايله واقفت وأصر إني اروح عند دكتورة تبعه وأمه، والدكتوره هولت الموضوع وقالتي إني خطر عليه أفضل كدا واني لازم تدخل جراحي، المهم إني خوفت من كلامها ووافقت وبقيت مدام، وطبعا دي أكبر غلطة وغلطة كبيرة أوي، وما كانش لازم أوافق عليها».
واستكملت الشابة الحزينة: «بعدها فضلنا عايشين مع بعض زي الأخوات، وأنا مش فاهمة في أيه بجد، ومحروجه اسأله لحد ما ابتدي يطلب مني طلبات غريبة، يعني حضرتك أكن هو بنت مش راجل فاهمني؟ كنت برفض، ودخلت على النت علشان أفهم، ووعرفت من اللي بيحصل إنه عنده شذوذ، روحت قولته، وما اعترضش بأي شيء».
تهديد بالموت ومحاولة انتحار وعرض صديق
وأشارت العروس الشابة: «قالي: اه ايه مشكلتك و أنا بحب كدا، اتصدمت بس بردوا مش عارفة أعمل ايه، لحد ما اتدي إنه يطلب حاجات أكتر، ولما ارفض يضربني ومرة خنقني وكان هيموتني، ومرة حاولت انتحر بسبب إنه كان حابسني وروحت مستشفي الدمرداش لأنه كانت حالتي صعبة، وعرض عليه إنه في مقابل إني أوافق على الحاجة دي صاحبه يبقي زي جوزي حضرتك، طبعا هنا وخلاص ما بقتش قادرة استحمل وفاض بيا».
ولفتت العروس الشابة: «بالصدفة دخل الحمام، ونسي تليفونه مفتوح، جالي فضول اشوفه بيتكلم مع مين علشان كان مبهدلني، فكنت شاكه إنه يعرف واحدة عليه، دخلت على الشات لاقيته بيتفق مع أمه إنه هيركب كاميرات في الشقة علشان يصورني وأنا براحتي في البيت، وعلشان كمان متفق مع صاحبه إنه هيخليه يدخل عليه الشقة وأنا لوحدي علشان يلبسني قضية وحشة علشان ما اخدش حقوقي».
العروسة: تركت له البيت ورافعة قضية خلع
واختمتت العروس الشابة سرد قصتها المأساوية لتوعية غيرها: «تاني يوم على طول سبتله البيت، ومن وقتها وأنا رافعة قضية خلع وفي مشاكل، وأنا آسفة إني طولت بجد».
تعليقات المتابعين بين تعاطف ولوم للعروسة الحزينة
وكان من بين تعليقات الناس على القصة الغريبة والصادمة والمأساوية: «يعني ايه صالونات مش بنسال عليه، ماتسالي كان حد منعك تسالي، وبعدين تسددي ليه فلوس وتدفعي ليه من اصله ليه وتقفي جنب خطيبك ليه انشاءالله، اما يبقي جوزك ابو عيالك ماشي لكن غير كده هبل يعني انتي كان ناقصك، حاجه علشان تعملي كده، يا ماما تقفي جنب جوزك بيت مقفول عليكم مش خطيبك».
«هما اللي بيتجوزوا صالونات مبيسألوش عن بعض !!!!.. اى كل الغلطات دى.. معلش ربنا نجاكي.. لا ياحبيبتي انتي لما عملتي كتب كتاب بدري، ولقيتي لسه بشكل ده واكتر كمان، كنتي تفركشي على طول، ربنا ديما يعت لينا رسايل منكملش واحنا اللي بنحب نكمل».
«طب وحلو كلام الناس دلوقتي ما انتي ماستفديش حاجه ما هما كده كده هيتكلمو اهوه ماكان من الاول كل واحد راح لحاله، وربنا يسهل لكل واحد، انما ازاي لازم نمشي دنيتنا وندمر نفسيتنا عشان الناس اللي هما اساسا فى تلك الحالات هيتكلمو حتى لو الجوازه نجحت، عموماً ربنا يعوضك… وايه اللي محتاجه تدخل جراحي وانتي معندكيش دماغ بتصدقي أي حاجة».
