EN
تداولت صحف ومواقع الكترونية أخبارا عن إعتزال المطرب سمسم شهاب الغناء، ووصفه للفن بالحرام، الأمر الذي جعله يقوم بتوضيح حقيقة الأمر من خلال الظهور في فيديو لايف عبر صفحته الرسمية على “فيسبوك”.
وقال سمسم شهاب: "فيه صحفي سألني بيقولي الفن وإلى آخره قلتله مش راضي عن الوضع اللي حاصل، قالي وبتهاجم بتوع المهرجانات ومش حابب الفن ده وبتدعو للفن الكويس، قلتله آه طبعا، قالي ما أنت بتغني في ملاهي ليلية، قولتله أنا مجبر إن شاء الله أحاول أبعد، فقالي ده حرام قلتله لو هنتكلم عن الحلال والحرام، ففيه كتير من الأئمة حرموا الغناء ف ادعيلي ربنا ياخد بأيدي وابعد خالص وده المشروع المستقبلي اللي بفكر فيه".
وتابع قائلاً :"سألني يعني أنت هتعتزل ؟ فقولت ده موضوعي اللي جاي عايز بس أقف على أرض صلبة عشان مبقاش حرقت نفسي، وخسرت ربنا ونفسي وخسرت حاجات كتير جدا، قمت لاقيت مواقع كتيرة وكبيرة بتكتب إني بعتزل الفن نهائيا، بس الحقيقة انا مقولتش كدة، ده قرار ناوي أخده في المستقبل، خلال فترة مش كبيرة”.
وأضاف: “فيه حاجة في دماغي عايز أعملها عشان لما ابعد أكون واقف على أرض صلبة عشان مرجعش تاني .. انتوا شايفين ظروف الحياة صعبة على الكل.. حبيت أوضح إن الكلام ده كلام مش صحيح وخبر غير صحيح، وخبر مش صحيح، وللأسف زعلان من الصحفي جدا، مش عارف ليه عمل كده الله أعلم، وواخد على خاطري جدا منه، مكنتش منتظر كدة أنا بحترم الصحفيين جداً وبتعامل بكل احترام وهذا ما يستحقونه والمفروض ده يحصل، لكن المفروض التصريحات متتحرفش، عشان كدة قولت اتكلم واوضح اللي حصل".
يذكر أن نشر المطرب الشعبي سمسم شهاب تعليقا عبر صفحته على موقع التواصل الاجتماعي “فيسبوك”، يعلن فيه عن وفاة شقيقه الأكبر.
وقال سمسم شهاب: "لله ما أعطى ولله ما أخذ.. توفى إلى رحمة الله تعالى أخى الكبير الحاج رضا شهاب.. أسألكم الدعاء له بالرحمة وأرجوكم قراءة الفاتحة على روحه فهو فى حاجة لكل ثواب ولكل حسنة فهو الآن يحاسب.. اللهم ارحمه واجعل قبره روضة من رياض الجنة.. إلى رحمة الله يا أخى وأبي وصاحبي وحبيبي وسندى.. جوايا كلام كتير وحزن يكفى العالم لكن إيمانى بالله يجعلني لا أملك إلا الصبر والدعاء والرضا".
