EN 
حصلت صدى البلد على خطابات أرسلتها نورهان خليل المتهمة بقتل والدتها مشرفة عمال بورسعيد داليا الحوشي من داخل محبسها.
وأرسلت المتهمة بقتل والدتها، بالاشتراك مع عشيقها خشية افتضاح أمرهما عقب كشف الأم المجنى عليها لتفاصيل العلاقة وتهديدها لنجلتها بفضح أمرها أمام والدها الخطابات إلى عمتها، والتى قامت بكتابتها بخط يدها، تتحدث فيها إلى أسرتها وخطيبها.
قاتلة والدتها لعمتها: ما تتخلوش عني
وقالت نورهان، قاتلة والدتها مشرفة عمال بورسعيد ، بالاشتراك مع الجار العشيق في خطابها : مش عارفه أكتب لك إيه ولا إيه ولا أبدأ منين جوايا كلام كثير عايزة أتكلم فيه معاكي وأحكي لك كل اللي جوايا زي ما كنا على طول، أنا شايفه أن الكل ضدي في الفتره الأخيرة طالبة منك الدعاء ليا أنا بنتك وأنت أقرب حد ليا، جيت هنا بحاسب على حاجه ما عملتهاش بس مقتنعه أن هنا بيكفر عني ذنوب ثانيه عملتها في حياتي وراضيه بحكم ربنا وصابرة، لكن صبري وطقتي انتهت وتعبت وخايفه على أخواتي وبابا وعليكم، وزعلانة علي أمي اللي راحت وهي غضبانه عليا.
قاتلة والدتها في بورسعيد: القاتل دمر حياتي
وأسردت قاتلة والدتها مشرفة عمال بورسعيد يا عمتو حسين دمر حياتي هو واهله وما عاتش فاضل لي حاجه أبكي عليها دلوقتي غيرك أنت وبابا وأخواتي مش محتاجه حد يحاكمني وحكم الإعدام هو إعدام لوحده ميته، اقول إيه لـ ابويا ولا اخواتي ولا أصحابي ولا خطيبي ولا الحكومة ولا القضاة ومفيش حد فاهمني، بس انت كنت الأقرب ليا ومازلت والله ما بفكرش في نفسي تفتكروا أنا عاملة إزاي وسط كل كلام الناس، بس أنا بقول لك أن أنا بفكر في شكل اخواتي وبابا في وسط الناس".
واستكملت نورهان: مش عارفة إزاي خطيبي بيمشي وسط الناس بعد ما راهن عليا، وساعات كنت بتمني حكم الإعدام واخلص، لكن في الأيام الأخيرة بقيت ادعي وأقول يارب حكم ينزل حتى مؤبد وأقدر أعيش وأكفر عن ذنوبي كلها بس الأكيد ، أني مش بحاسب في القضيه دي لأني لا يمكن أعمل كده، وأنت أكثر واحده واثقة من ده ومهما كنت جامدة وقوية في حاجة والله ما قتلت ماما ولا كنت هقتلها ولو على موتي والله العظيم ، والله يا عمتو ما كنت اعرف أنه هينفذ حاجه عيل اصغر مني بثلاث سنين يعني عمره ما يعمل كده وما كنتش عارفه الغل اللي كان جواه من ناحيتنا كده وأهله كانوا عارفين وموافقين على كده، والله فعلا ده اللي حصل خطط وعرف يوقعني وعرفوا يدمروني بس ورحمة ماما يا شيماء ولو على موتي هاخد حقي وهنتقم منه.
وأكملت قاتلة مشرفة عمال بورسعيد : أنا جيت هنا يا عمتو وحكومة كتير وتحقيقات كثير وقلت حاجات والله ما كنت أنا، في وقت التحقيقات ما كنتش واعية ولا كنت حاسة ولا حتى بدرجة صغيرة وكنت أسكت من صدمتي، ويوم ما حصل اللي حصل يا شوشو أنا كنت متكتفة وكنت خايفة على أحمد أخويا أن ممكن أضيعه بكذا طريقة، وما رضيتش بكده وخوفي عليه خلاني أعمل كده وأبقي مدام وما أخافش على نفسي.
وتابع: يا عمتو شيماء أنا عاوزاك تقولي لاخواتي أنهم وحشوني جداً، وإن ما بحبش حد قدهم في الدنيا، وقولي لأحمد وفهميه أن لأخر يوم هكون خايفه عليه، وهفضل أخاف عليه وأحبه.
واسترسلت: يا عمتو انا بجد نفسي اخرج علشان نرجع لحياتنا تاني وما اتحرمش منكم صعب عليا قولي لبابا إن أنا مش فاجرة، قولي له إني آسفه ومش ناسيه كلمته ليا في آخر مشكلة، لما قال لي غلطه كمان وهتبرى منك المرة دي حصل وهو حقه يتبرى مني، وأنا مش زعلانة منه أنا عذراه وشايله ذنب موت أمي وذنب أبويا واخواتي وانتم وحاجات كثير قوي، وانت اعذريني أن في حاجات الفتره الاخيره ما عرفتش أحكي لك عليها سامحيني وافضلي معايا على طول وخليني أشوفك على طول وخلي بالك من اخواتي بالله عليك وادعي لي دائما ربنا يغفر لي ويسامحني.
قاتلة والدتها في بورسعيد تطالب أهلها بالتنازل عن الحق المدني
وأضافت : “أنا جلستي يوم 18 مش عارفه إيه اللي هيدور فيها بس الكل بيقول اللي رفع القضية عليا سواء بابا أو حد من أهلي لو تنازلوا عن الحق المدني ، هاخذ من 5 لـ 7 سنين فيا ريت لو ده ينفع اعمليه ويبقى كفايه كده قوي حرام اشيل حاجه ما عملتهاش وتحاسب دنيا واخره وكفايه اللي احنا فيه وان شاء الله هيكون لينا كلام ثاني في الايام الباقيه من حياتي”.
وأنهت خطابها، ما تخليش المحامين يطلعوا حسين دوت لأنه قاعد في المؤسسة القضائية في المرج، وربنا هيحاسبه يوم الحساب وكان لينا عمر وطلعت يبقى في كلام ثاني، وسلمي على كل الناس وادعوا لي كثير، وسلمي على محمد خطيبي وحماتي وقالوا لهم ما يزعلوش.
١٨ فبراير الحكم النهائى عقب ورود رأى المفتي
يذكر أن محكمة جنايات بورسعيد كانت قد أصدرت حكمها بإحالة أوراق نورهان خليل قاتلة أمها ببورسعيد لفضيلة مفتي الديار المصرية، وحددت جلسة 18 فبراير للنطق بالحكم، وأودعت محكمة جنايات الأحداث عشيقها المتهم إحدي دور الرعاية.
