EN
أثارت ابنة أحمد خليل أباظة، المعروف عبر مواقع التواصل بـ«مذيع الجنازات»، حالة من الجدل بعد ظهورها في مقطع فيديو وجهت خلاله استغاثة لوالدها، متهمة إياه بإهمالها وشقيقها منذ 14 عامًا، ومطالبة بحقوقهما في النفقة.
وقالت ابنة مذيع الجنازات: «أنا جاية أطالب بحقي أنا وأخويا، أنا باخد 200 جنيه، وأخويا بياخد 400 جنيه من بنك ناصر، وكمان حتى مش بيدفعهم، البنك هو اللي بيدفع لينا». وأضافت أنها تطالب بزيادة النفقة، قائلة: «أنا شايفة حضرتك ما شاء الله طالع مذيع على النت ويوتيوب وحاجات حلوة».
وتابعت: «أنا عايزة مصاريفي، أنا بنتك، ونفسي أقولك يا بابا، أنا محرومة من كلمة بابا، وراميني على الناس اللي ملهمش أصلًا إنهم يصرفوا عليا، حضرتك اللي المفروض كنت تصرف عليا».
كما وجهت رسالة لوالدها بشأن والدي والدتها، قائلة: «جدو رضا اللي حضرتك بتقعد تشتم فيه، وتيتا، أنا ليا حق تاخد مصاريفي منك، وهما طلعوا على المعاش، هيصرفوا أكتر من كده منين؟ وماما هتصرف أكتر من كده منين؟».
واختتمت حديثها قائلة: «حضرتك فين من 14 سنة؟ قابلتني في العيد اللي فات واتصورت معايا وحطيت اللقطة، وبتيجي تكلمني في الموبايل، لكن مبحسش إنك كده».
ولم يصدر حتى الآن أي تعليق رسمي من أحمد خليل أباظة بشأن ما جاء في الفيديو المتداول.
