EN
وجّه الإعلامي محمد فارس، مقدم برنامج «في ضهر الأهلي»، رسالة إلى جماهير القلعة الحمراء قبل انطلاق مشوار الفريق في بطولة الدوري المصري الممتاز، مطالبًا بضرورة التركيز على دعم الفريق والابتعاد عن الجدل الخاص بعروض الرحيل وملفات تجديد عقود اللاعبين.
وقال محمد فارس: «النادي قفل مناقشة أي عروض لرحيل اللاعبين، طالما كلها عروض مش مناسبة لمطالب الأهلي».
وأضاف بشأن ملف التجديد: «النادي وقف المفاوضات، وبلغ اللعيبة بالرقم المناسب له للتجديد، وقال: اللاعب اللي يشوف العرض مناسب، يبلغ مدير الكرة، كابتن وائل جمعة، وأهلًا بيه. غير كده، العقود مستمرة بدون أي تعديل على قيمتها».
وشدّد فارس على ضرورة تركيز الجماهير مع الفريق خلال الموسم الجديد، قائلًا: «الناس المؤثرين في السوشيال ميديا والجمهور كلهم بيقولوا: نركز مع الفريق في الموسم اللي ما عندناش رفاهية نقع فيه، والدعم للأهلي مش للاعبين».
وتطرق مقدم برنامج «في ضهر الأهلي» إلى موقف إمام عاشور واستبعاده من قائمة الفريق لمواجهة الشرقية إنبي، موضحًا: «استبعاد إمام، المُعلن إنه بسبب عدم الجاهزية، يبقى نقطة ولا يشغلني تفاصيل بعدها. أنا مش مشجع خفيف، لما المدرب يشوفه جاهز، يقرر هو محتاجه ولا لأ».
وأضاف: «أي لاعب خارج قائمة الأهلي هو اللي محتاج يدخل القائمة، مش العكس».
واختتم محمد فارس رسالته بالتأكيد على أهمية مساندة الفريق بعيدًا عن الأسماء، قائلًا: «فنساعد الأهلي يقفل القصة دي. محدش عايز يعرف حاجة ولا كواليس ولا مهتم غير بإن الأهلي يكسب. الناس بتشجع الأهلي، وبتشجع اللعيبة عشان الأهلي، مش لأشخاصهم».
وتابع: «لو أي لاعب منهم برا الأهلي بكرة الصبح، فهو زيه زي أي لاعب تاني في مصر خارج الأهلي، وأصغر شبل في الأهلي عنده 10 سنين هيبقى أولى بالدعم منه».
واختتم: «دي بديهيات، لو رجعنا ليها هنكسب بالـ11 اللي في الملعب، وده دورك ودوري ودور كل واحد فينا. نرجع لكتالوج الأهلي، هنستريح والله».
موعد مباراة الأهلي والشرقية إنبي
ويستعد الأهلي لمواجهة نظيره الشرقية إنبي، في تمام الساعة الثامنة مساء اليوم الأحد، على استاد القاهرة الدولي، ضمن منافسات الجولة الأولى من بطولة الدوري المصري الممتاز.
وتأتي المباراة عقب عودة الأهلي إلى القاهرة، بعد انتهاء معسكر الفريق الإعدادي في إسبانيا، والذي خاض خلاله عددًا من المباريات الودية استعدادًا لانطلاق الموسم الجديد.
القنوات الناقلة لمباراة الأهلي والشرقية إنبي
ومن المقرّر أن تُنقل مباراة الأهلي والشرقية إنبي عبر قناة «أون سبورت»، الناقل الحصري لمباريات بطولة الدوري المصري الممتاز.
