محمد حمدي يكتب: يا دنيا

يا دنيا يا مغلباني
يا شاقة حياتي شق
املاكي فرح و اغاني
لعل حالك يرق
تردي فرحي دموع
و ليلي عذاب وويل
و سفر من غير رجوع
و غربة بالها طويل
مامشيش طريق و اكمله
و لا حلم مره اقفله
و لا ضحكيات يجلجلوا
على صوت طبلة و رق
يا دنيا حالك غريب
و الضحكة فيكي يتيمة
لا صاحب و لا حبيب
ولا فرحة ليها قيمة
مع اني عارفك و مجربك
لكني لسه بستغربك
مين ده اللي ممكن يجربك
و مايحطش صوابعه في شق
يا دنيا انا قلت اصاحبك
مالقتش فيكي ود
و لما بحرت في مراكبك
توهت بين جزر و مد
اخدتي من عمري زهره
اخدتي من قلبي طهره
و طموحي كسرتي ضهره
و حلمي عملتيه مدق
يا دنيا يا مغلباني
يا شاقه حياتي شق