EN 
رد الفنان محمد هنيدى على عدد من الاسئلة لمتابعيه عبر صفحته على موقع التواصل الاجتماعى فيسبوك.
وتحدث هنيدى عن موقف كوميدى جمعه بالفنان الراحل علاء ولى الدين قائلا : كنا أنا وعلاء ولي الدين قبل ما نتشهر .. كنا بنروح المهرجانات ونضرب البدل وندخل البوفيهات بعد الافتتاح ونضرب في البوفيه المفتوح .... وفي مرة لقينا الفنانين كلهم في مطعم كدة بعد الحفلة.. دخلنا وقعدنا ومحدش يعرفنا خالص .. وعمال الجرسون يحطلنا اكل ونطلب تاني ويقولنا تحبوا تجربوا كذا ونقول ماهو ببلاش .. نجرب .. وعلاء يقولي الراجل ده كريم اوي . خلصنا وجايين نقوم وبنخرج من المطعم . لقينا كل اللي شغالين في المطعم ورانا .. كنا خلصنا تقريبا نص البوفيه .. المبلغ قعدنا نسدد فيه انا وعلاء ٦ شهور".
قصير القامة
كما علق محمد هنيدى مجددا على سؤال قصر قامته قائلا : “السؤال بيتكرر كتير.. وللأسف هضطر اجاوب عليه والاجابة هتكشف عن واحد من اسرار الكون.. لما بدأت تمثيل قبل شهرتي كان فيه مشكلة كبيرة جدا بتواجهني وهي اني كنت طويل جدا جدا لدرجة ان وشي كان بيخرج من كادر الكاميرا والكاميرا بتوصل لسرتي .. وطبعا مش همثل بسرتي خصوصا اني بدأت أغير منها .. مش معقولة سرتي تبقى اشهر من وشي.. سافرت السنغال .. لان فيها ناس طويلة كتير وبيواجهوا نفس مشكلتي وهناك التقيت بساحر سنغالي ... نفس الساحر اللي ساحرلنا في تصفيات كاس العالم ،، وعملي حجاب ان الناس تشوفني قصير والكاميرا كمان تشوفني قصير .. وفي حالة اني قطعت الحجاب ده او ضاع مني .... هرجع طويل تاني”.
محمد هنيدي وموهبته
بينما كشف محمد هنيدى عن الشخص الذى اكتشف موهبته قائلا : "عارفين هشام منصور الممثل ؟ .. اللي كان عامل في فيلم صعيدي في الجامعة الامريكي مشهد هي دي شقة المعلم فوزي ومراته الجديدة.. اول يوم في حقوق هو كان رئيس فرقة التمثيل فلقيت واحد جاي بسرعة كدة عليا وبينهج وكانه هيضربني ... بيقولي انت عايز تمثل؟! بقوله ايه ... قالي نفسك تمثل ؟ قولتله مش فاهم؟ قالي اسمك ايه اسمك ايه وبيزعق كدة.. قلتله محمد هنيدي ... قالي خد املا الورقة دي .. قلتله ورقة ايه ... قالي املاها من غير كلام.. طبعا انا خوفت خصوصا انه كان اطول مني.. بعدها تاني يوم بالليل كدة لقيت الباب بيخبط.. بفتح لقيته ع الباب وبيسألني .. هي دي شقة محمد هنيدي؟!.. قولتله يخربيتك انا محمد هنيدي انت ايه اللي جابك.. قام قايلي مش تكتب عنوان صح بقالي ٣ ساعات بدور عليك.. انتوا طابخين ايه؟!.. ... دخل وأكل معانا ومن يوميها بقى صاحبي وحبيبي".
