EN 
كشفت الفنانة يسرا؛ خلال لقائها في برنامج "كلام نواعم" عبر قناة mbc1 عن أسباب عدم رغبتها في فكرة الأمومة.
أكدت يسرا أنها لا تشعر بالحزن لأنها لم تنجب أطفالا بل على العكس تحمد الله على ذلك، حيث حكت عن سبب قرارها بعدم إنجاب أطفال.
وقالت يسرا: وأنا في التلاتينات كان عندي هاجس أني لازم أبقى أم لأني معطاءة بطبعي كنت هموت وأخلف، وبعدين حصل أني فقدت طفلين في جوازتي الأولى، لما اتجوزت خالد قولتله نخلف ملقتوش مبسوط من الموضوع دا وقال نشوف.
واضافت يسرا : قولت مش عاوز يخلف مني وسألته إن كان قلقان أني مكونش أم كويسة قالي أنتي الست الوحيدة اللي أتمنى أخلف منها لكن الزمن اللي هنخلف فيه على بال ما يكبر بعد 20 سنة هتبقى حياة مختلفة مش هيشوفوا اللي إحنا شفناه هتبقى حياتهم أسرع وسطحية وأنا مش عاوز أشوف عيالي كده، وأنا بعد فترة اقتنعت وبقول الحمد لله أني مخلفتش.
وتابعت يسرا موجهة رسالة إلى كل السيدات: أوعوا تزعلوا من قدر ربنا مديهولكم قدر أنتم مش حاسين بيه، مع الوقت تخطيت الشعور وبالتجارب شفت ناس فقدوا أولادهم ومش قادرين يعيشوا وشفت ناس أولادهم عاصيين ليهم معرفش إيه ممكن كان يحصلي ممكن مكنش استحمل أن يكون عندي طفل ويموت وبالنسبة لي خالد هو حياتي وابني وجوزي ربنا عوضني وبقول للي ما خلفش ميزعلش واللي خلف يحمد ربنا.
يسرا والرقص :
وقالت يسرا خلال اللقاء إنها من النجمات اللاتي يحببن السعادة ويستمتعن بحياتهن في كل ثانية، إذ أوضحت: عمري ما فكرت أقول مينفعش أعمل كده أنا كبرت.
وتابعت يسرا: بحترم السن اللي وصلتله، والناس هيقولوا إنتي بترقصي في أماكن وبتغني، طبعا برقص وأغني أنا بحب أنبسط، وأعيش، وبحب الناس اللي معايا يكونوا مبسوطين، العمر مجرد رقم.
مسلسل يسرا:
على جانب آخر، بدأت يسرا تصوير مشاهدها في مسلسلها حمد الله على السلامة، المقرر عرضه في موسم رمضان المقبل لعام 2023، حيث يضم العمل كلا من شيماء سيف، آدم الشرقاوي، مايان السيد، محمد ثروت، أوتاكا، ولأول مرة المطرب عنبة، وهو من إنتاج العدل جروب، وتأليف محمد ذو الفقار، وإخراج عمرو صلاح.
تجري أحداث مسلسل حمد الله على السلامة في إطار الكوميديا الاجتماعية، حول شخصية يسرا التي تُدعى منى السويسي، وتأتي بنجليها إلى مصر بعد وفاة زوجها بالغربة، وتحدث لهم مواقف طريفة وإنسانية.
