EN
كشفت الفنانة عارفة عبد الرسول سبب نجاح مسلسل “بالطو” من خلال منشور عبر حسابها بموقع التواصل الاجتماعي “فيسبوك".
وكتبت عارفة عبد الرسول:" كلمتين محشورين فى زورى حاقولهم ورزقى على الله...ليه مسلسل بالطو نجح النجاح المدوى ده...لانه شبهنا بتاعنا...مافيش حد ماشافش حته منه او حد شبهه فى طرشوخ الليف تقول لنفسك فجأة..اه والله كان بيحصل كده...احنا كممثلين ماكناش احنا ...بس كنا احنا".
وأضافت :"وفى كلمه قالهالى المخرج عمر المهندس على جنب كده...لما كان بيعمل الكاستينج للمسلسل داخ عشان يلاقى بنت شبهنا من طبقه متوسطه ومن مدينه فى الريف تبقى دكتوره فى وحده صحيه فى ارياف برضه...كل البنات لاعبه فى شكلها وتاتو وشفايف وحواجب....كلهم دكتور تجميل واحد عامل قالب واحد....وقع الاختيار على مريم الجندى...مش عشان هى بنت محمود الجندى ولا اخت احمد الجندى...ولا عشان هى ممثله كويسه...رغم انها ممثله ممتازه...ولاعشان كانت فى ورشه استاذنا خالد جلال ولفت لفه حلوه ع المسرح ...اتكحرتت يعنى كل ده مكانش سبب لترشيحها للدور...السبب كان شكلها العادى...بنتنا...مننا".
وأوضحت:"صرخه مكتومه من قلبى للبنات ارجوكم.. حبى شكلك اللى ربنا وهبه لك ...مناخيرك كبيره شويه وماله دى ميزه...سنانك معووجه مايضرش دى ميزه ...ارجوكم...كونوا عاديين".
تصدر مسلسل بالطو تريند مواقع التواصل الاجتماعي بعد انتهاء حلقاته، وحرص عدد من نجوم الفن والنقاد على شكر صناعه وأبطاله وتوجيه رسالة لهم من خلال منصات السوشيال ميديا.
تحية للصناع
أشاد الكاتب محمد أمين راضي بمسلسل بالطو، وذلك عبر صفحته علي موقع التواصل الاجتماعي الشهير فيسبوك.
حيث قال محمد أمين راضي: "بعيدا عن المطب اللي حصل واتكلمت عليه .... بالطو مسلسل جميل.. جميل جدا كمان ... والله متضايق انه خلص ... تحية لكل صناعه و لكل نجومه ... ومبروك يا عصام.
جدية نادرة
وكتب الناقد اندرو محسن: "مسلسل بالطو بالتأكيد من أفضل المسلسلات المصرية اللي شفتها في الفترة الأخيرة، مسلسل معمول بجدية بقت نادرة للأسف، فيه اهتمام حقيقي بكل عناصر العمل، كاست شبه متكامل مع اختيار ممتاز للوجوه الجديدة، الحلقات كلها مكتوبة كويس وممتعة يمكن باستثناء حلقة واحده، السيناريو اللي كتبه أحمد عاطف فياض فاهم طبيعة شخصية نقيض البطل وخلى ده ينعكس على النهاية.
وتابع: "طبعَا المخرج عمر المهندس فاهم طبيعة الكوميديا اللي بيقدمها، وبالتالي مخلي الممثلين أغلبهم ملتزمين بإطار واحد وواضح بتخرج منه الكوميديا المعتمدة على الموقف بالأساس.
وأضاف: "يمكن أكون متحمس شوية زيادة بس كل ما بفكر بلاقي إن ده واحدة من أجمل المفاجآت اللي أشوفها.
مسلسل "بالطو" على مدار 10 حلقات فقط، ويتم طرح حلقتين كل يوم أربعاء، وتدور أحداث مسلسل "بالطو"، في إطار كوميدي حول مهنة الطب، وما يحدث بدور الرعاية الصحية فى أحد المستشفيات، حيث يرصد العمل العديد من الأحداث التي يتعرض لها الممرضون والأطباء في وظيفتهم، بالإضافة إلى رصد تفاصيل حياتهم اليومية.
