أنا مش مسامحة أي حد اتكلم علينا وخاض في أعراض.. نعمة حسين ترد على انتقادها

وأضافت: "قبل اي كلام البوست دا ما هو إلا رد اعتبار وردع أكاذيب اتوجهتلي ومكنتش مجبرة إني أطلع اوضح منها اي حاجة لانها ببساطة تخص حياتي الشخصية اللي كنت بقفل عليها بقدر المستطاع وكل اللي متابعني عارفين دا كويس.. خليني ابدأ كلامي ب ايه اللي حصل اصلا عشان كل دا يبدأ؟".

وتابعت: "الناس اللي شايفة اني السبب في الأحداث دي من أولها طالما أعلنت وروجت عن الموضوع دا من البداية يبقى أستحمل اللي يحصل.. مبدئيًا كدا أنا مطلعتش أعلنت اصلا عن حاجة من البداية ولا هطلع أشهر حياتي الشخصية عشان مفيش شخص عاقل طبيعي يعمل دا".

وأوضحت: "لكن القصة اللى حصلت وبتحصل فى كل مرة يظهر فيها تريند جديد هي "جروبات البنات" اللي كلنا عارفينها وبدون ذكر اسمائهم لما لقيت عدد من البنات من الجروبات دي هما اللي بدأو يدوروا ورايا وكأني ارتكبت جريمة بمجرد ما نزلت سيشن الفرح وعينوا أنفسهم قضاة على حياتنا ووضعوا لنفسهم الأحقية انهم يقتحموها ويعرفو أسرارنا وينشروها ويشهرو بيها لمجرد انها مش على مزاجهم، وبدون اي علم وجهل عن تفاصيل الموضوع بشكل كامل بدأوا بنشر اسكرينات وصور قديمة لأكونت جوزي واكونت الزوجة الأولى كمان، ونشروا كلام مغلوط زي اني خطافة رجالة واني خطفت جوز صاحبتي وهكذا والكلام دا كله كان بدون ما أعلن عن اي حاجة اصلا".

واستطردت: "ويكأن مشاهير السوشيال ميديا عرضوا حياتهم للمشاع ومن حق أي حد يتكلم فيها لمجرد انهم بقوا مشاهير فأنا زي اي بنت بيتقال عليها كلام غلط بديهي طلعت ادافع عن نفسي واكدب الكلام دا ونزلت صورة لينا احنا التلاتة كتبت عليها عيلتي التانية، اللي هي كانت "رد فعل" للي هما عملوه اصلا، وغرضها كان علشان أبين ان كل الأطراف موافقة ومرضية، وشو اني خطفت حد من حد دا كدب الموضوع من قبل ما يتفتح معايا أنا شخصيا كان بعلمها وموافقتها اولا، ونقطة انها صاحبتي ف دي كمان تأليف واغلبية الناس اللي متابعاني عارفة صحابي بالظبط، وأنا معملتش حاجة غير اني اتزوجت على سنه الله ورسوله قبل شهر رمضان بـ اسبوع وحتى ما أعلنتش عن اي تفاصيل وقت الخطوبة ولا كتب الكتاب ولا حتى الفرح ولا أي خطوات حصلت ف الموضوع غير لأقرب الأقربين ودا بسبب ظروف البلد اللي كانت غير مستقرة ولانها ببساطة شديدة حياتنا احنا".

واسترسلت: "مع ذلك لما بدأت أشوف كومنتس سلبية على الصورة اللي نزلت وشتايم حتى مش عليا لوحدي دا كمان على الزوجة الأولى مسحت الصورة احترامًا لمشاعرها ولنفسيتي لان اكتشفت ان الناس كدا كدا مش هتسيبك ف حالك لمجرد ان المسأله كانت مسأله "تعدد" ولانك عملتي حاجة عكس اقتناعهم".

ونوهت: "وبعدها زاد الكلام وكله بقى يعلى على التاني واللي قال اني اتزوجته عشان الفلوس!! واللي قعد يجيب في اسكرينات قديمة من شهور طويلة لمجرد انه يجرح فينا وكان منها الحقيقي ومنها الفيك! واللي بدأ ينشر صور ليا بشعري كنت مسحتها بعد ما ربنا أكرمني بالحجاب واللي طعن وقال دي عملت كده للشهرة! وكله بقى يزايد على التاني في سبيل إيذاء أسرة قاعدة في حالها، لحد ما نزل سيشن لينا احنا التلاتة كان متاخد من فترة اصلا و بدون علمنا نزل بنية الدفاع عننا من أحد الفوتوجرافرز ونزله ع صفحته عشان يأكد انهم عايشين حياة سعيدة ولما شوفنا الصور طلبنا انها تتمسح لان مفيش راجل هيقبل انه يشهر بأطفاله وأسرته على السوشيال بالطريقة دي وبالفعل مسحها من عنده على طول، بس كان الناس كالعادة خدوها للاسف ونشروها اكتر".

وقالت: "يعني التريند والاعلان انتوا اللي عملتوه من البداية على حساب حياتي الشخصية! ولو كنتوا قبل اي حاجة دورتوا فى كل حساباتى عالسوشيال مكنتوش هتلاقوا ولا كلمة او صورة عن الموضوع دا قبل ما تعملو الليله دي كلها لانى حبيت احتفظ بالموضوع لنفسي ومتكلمتش فيه غير بسبب دفاعي عن شتايم واتهامات اتوجهت ف حقنا، وأنا لو كنت بعمل كدا عشان الشهرة زي ما البعض بيقول ف أنا كان زماني قبلت عروض الناس اللي طلبت اني اطلع معاها ف برامج ع التليفزيون وقنوات مشهورة ومعروفة جدا، والاعلام يتكلم اكتر والجرايد تتكلم اكتر واستغل التريند بحق وحقيقي".

وأضافت: "وانا قررت يبقى ظهورى الأول والوحيد هو هنا من غير حتى مع أنزل فيديو يطلع عليه فئة تانية من الناس تتهمني بإني بعمل مشاهدات وشهرة واكتفيت ان كلامي يكون في بوست افهمكم فيه بعض الحاجات المغلوطة، واى كلام موجود فى اي مكان سواء كان ع المواقع او الجرايد او على لسان بعض الانفلونسر ع السوشيال ميديا او من اي حد قرر يستغل الوضع ويتكلم فيه فـ دا كله كلام من وحى خيالهم واستنتاجات درامية ربنا وحده شاهد اننا احنا التلاتة منعرفش عنها حاجة اصلا ومحدش فكر يرجع للأطراف المعنية بالموضوع ويسألهم حصل إيه؟ وكل واحد قرر يستغل التريند ويحاول يكسب ويتشهر من خلاله ع أعناق أو أعراض الناس".

وأوضحت: "النقطة التانية وهي مقولة "انتي شخصية معروفة ف مينفعش تروجي لحاجة زي كدا عشان محدش يقلدك" أولا أنا مش طالعة أقول للناس خدوني قدوة واعملو زيي لأن ببساطة تفاصيل كل واحد فينا بتختلف عن بعض وكل واحد مسئول عن تصرفاته ومحدش عالم بالخبايا والأسباب وأسرار البيوت اللي تدفع أي حد لأخذ الخطوة دي، ثانيا احنا معملناش حاجة حرام ولا غلط عشان نخجل منها او اننا نتكلم عنها يعني، ومتنسوش ان الشرائع السماوية لا تقبل المزايدة ولا اتباع الأهواء، ونقطة اني داعية مع اني مطلعتش في اي فيديو ليا قولت حاجة زي كدا لانها مسؤليه كبيرة مش أي حد يقدر يشيلها وفيديوهاتي كلها كانت نصيحة ليا شخصيًا قبل ما تكون ليكم وكل الموضوع اني كنت بحاول اقدم محتوى هادف ليا وليكم، وفعليا عندى كلام كتير وظروف وتفاصيل شخصية أقدر احكيها لا يعلم عنها احد لتبرير موقفي ولكن انا مش مجبرة اصلا اعمل ده لمجرد انى خدت خطوة خاصة بيا أنا، سواء كنت شايفها انت من وجهة نظرك فيها ضرر ما أو فايده ف في الحالتين الموضوع هيأثر علينا احنا لوحدنا".

وتابعت: "آخر نقطة وعشان اقفل الموضوع دا بالنسبالي نهائي عايزاكم تتخيلوا معايا كدا المشهد دا لـ"أسرة متكونة من ٣ أشخاص وعايشين في حالهم راضيين بنصيبهم وحياتهم" ظهرت ناس من برا دوروا فى حياتهم وخباياهم ونزلوا صورهم في كل مكان وشهروا بيهم وشتموا فيهم بأسوأ الألفاظ وكأنهم ارتكبوا جريمة لمجرد انهم اكتشفو حاجة تخص حياتهم هما لكن مش على مزاجهم!! في النهايه أنا مش مسامحة أي حد اتكلم علينا وخاض ف أعراض واغتابنا ولمسنا بأقذر الألفاظ واتهمني بأفعال محصلتش لمجرد اننا خدنا خطوة لا غلط ولا حرام ولا حتى تخص حد غيرنا، ولو انتي كونك بنت معترضة على مسألة التعدد ف لكِ كامل الحرية في التعبير عن رأيك ولكن متاخديش من حياة غيرك مثال وتستغليها في اعتراضك، عايزه تعبري عن رأيك افهمي الحريات صح وعبري عنه من غير ما تقتحمي حريه خصوصيات غيرك، السوشيال ميديا بقت عبارة عن مكان للكشف عن أسرار الناس وتتبع عوراتهم والخوض فيها واقتحام حرمة البيوت والإساءة عن جهل والغيبة والنميمة، مش مكان للتعبير عن الرأي والرأي الآخر أبدًا.. ودا الي بقيتوا تسموه "تريند" وأنا خصيمة أي حد يوم القيامة أساء ليا عن جهل.. وبشكر كل شخص رد غيبتي وقدر يفهم المعنى الحقيقي لـ "من حسن إسلام المرء تركه ما لا يعنيه".