ناقد رياضي: لاعبو الفئة الأولى بالزمالك مُبالغ في أجورهم.. وشيكابالا لا يُقارن

تحدّث الناقد الرياضي عمرو الدردير عن الرواتب الكبيرة التي يتقاضاها لاعبو الفئة الأولى في الدوري المصري الممتاز.

وكتب "الدردير" عبر حسابه على فيسبوك: "أنا بستغرب من مرتبات لاعيبة الفئة الأولى في الدوري المصري! يعني زيزو مميز في الكرات العرضية، إمام عاشور جامد في التسديد، وعبدالله السعيد بيتحكم في إيقاع اللعب، وتريزيجيه سرعته خارقة."

وتابع: "بس أنا شوفت الراجل الأسمر ده بيعمل أوفرات وهو جسمه مش متوازن أصلًا! من أوضاع مستحيلة، والكرة بتلف تروح على رأس المهاجم بالملي. شوفتُه بياخد الكورة من عند الجون، يزحف اللي قدامه على وشه، ويروح يسجّل. شوفتُه بيسجل من نص الملعب في الشرطة، ومن فاولات قدام فرق كبيرة، ومن زوايا مستحيلة زي جول إنبي والحرس.. شوفتُه بيسجل بعد ما يعدي من واحد، وشوفتُه وهو بيعدي من 3 و4 ويسجل!"

وأضاف: "أول لاعب في مصر شوفته بيجمع بين السرعة والمهارة والتسديد، وكل ده والكرة تحت رجله، مسيطر عليها مش بتبعد عنه لحظة. دلوقتي كل لاعب مميز في حاجة واحدة بس."

واختتم: "شيكابالا الوحيد اللي كان عنده كل المميزات اللي غيره بياخد ١٠٠ مليون علشان عنده واحدة بس منها! من الآخر... اللي شاف شيكابالا شبع كورة، وميملاش عينه أي بلونة."