ولاد الأبالسة "الحلقة الثالثة"

السابعة
وثلاث دقائق.. موعد أذان المغرب.. مدفع
الإفطار اضرب..

# يلا يا شيخ تعالي بل ريقك بشوية تمر.. انت مش
صايم ولا ايه يا اخي ! ( هكذا كان يتحدث
رجل بجلباب قصير ولحيه طويله موجها حديثه لابو بكر )

-
صايم! ايوة ايوة طبعا صايم.. اومال ايه يعني.. اكيد
صايم.. الصيام فرض للمسلمين. اصل انا مسلم
واسمي ابو بكر ولحيتي طويلة والحجر
في وشي.. قصدي الزبيبة اهيه..! مش شايفها لا ايه!

# ايه
يا شيخ مالك بتحلف ليه ومُرتبك ليه كده!
مش قصدي يا سيدي.. انا بس عايزك تخلي البساط احمدي.. احنا هنا على مائدة
رحمن مش في الاوبيرج يا راجل.. "ضحكه مقززه يتسلل منها رائحة البسله
المتساقطه علي لحية الرجل"

- لا
واللهي يا كابتن.. انا جاي اهوه... انا ابن بلد ومصري ومسلم وبصوم رمضان وفيه زبيبه فراسي اهيه.. مش شايفها
!!!

#
"ده ايه الراجل اللاسع ده".. يا شيخنا والله عارف.. وبعدين كابتن ايه..
انت شايفتي ماسك صفارة ولابس شورت ولا ايه ..
ناديني بشيخ ابو جهاد..الا الكريم اسمه ايه؟

- ابو
بكر ينظر حوله في كل اتجاه....ثم يسأل.. الكريم مين ! ؟

# اللهم
طولك ياروح... اسمك ايه يا شيخ ومنين؟

- انا
اسمي ابو بكر مصرى ومسلم وبصوم رمضان وفيه
زبيبـ......

# خلاص
خلاص خلااااص يخربيت اللي يزعلك يا شيخ.. يلا تعالي خد 7 تمرات ابلعهم عشان نلحق
المغرب والعشا والتراويح وبعدين نفطر!

- مغرب
وعشا وتراويح! نصلي يعني!؟

# ايوه
طبعا يا شيخ.. هههه انت مش بتصلي ولا ايه .. هههه.. شكلك جعان النهارده.. يلا يلا
خفيف كده عشان الشيطان مايغلبكش...

-
الشيطان متسلسل.. متنيل على عين امه متهبب متسلسل.. ماهي دي المصيبة... وهوه ده
اللى مجننى !!! وبعدين انا بصلي طبعا لاني
مسلم ومصري واسمي ابو بكر وصايم رمضان وبلحيه طويله وعندي زبيبه فراسي.. مش شايفها
ولا ايه !؟

# شايف
امها يا اخي.. يلا بينا عشان نلحق .. وبما انك ضيف احنا عندنا عاده في الزاويه
بتاعتنا ان الضيف هوه اللي بيقيم الصلاه وبيقف بجوار الامير!

- بيقيم
الصلاة.. أحــ ! .. .. !!

# بتقول
ايه!!؟

- بقول
احلي حاجه عندكو ان الضيف يقيم الصلاه ده
حتي احنا عندنا ممكن نعملها بعد كده ...

# ايوه
عندكو فين بأه ... ده اللي انا عايز اعرفه من الصبح ... انت مالقاهرة ولا بلدك
ايه؟

- انا
من مصر يا شيخ .. واسمي ابو بكـر ومسلم وبلحـــ
....

#
لااااااا خلاص ارجوك يا اخي خلاص مش عايز اعرف.. يلا بينا نلحق الصلاة ولينا كلام
بعد التراويح ...... متوضي يا شيخ ولا تجدد وضوءك..؟

- ايوه
متوضي من فوق ولابس الجلابية وعامل زبيبه ودقن وكله تمام....

# من
فوق فين يا عم... ده ايه الروشة دي!

- لا
ماتخدش فبالك يلا يلا نلحق الصلاه عشان
الشياطين المتسلسله بنت الكلب دي تتغاظ ... هههه ههه "ضحكه شريره"

#
"يا جماعة الخير اعرفكم بعضو جديد معانا بعون الله اسمه الشيخ ابو بكر
واستأذن اميرنا في ان يقيم ابو بكر الصلاه وفقا لعادة الجماعه بعد اذن
الجميع..."

# مرحبا
ابو بكر.... مرحبا اخي.. مرحبا اخ الاسلام
... مرحب .. هكذا رحب كل الحضور بأبو بكر قبل ان يأمره رجل يرتدي عمامة كبيرة يقال
له الامير بأن يقيم الصلاة .!

- احم
احم... ايه ده صوتي منحاش.. ايه ده انا مش عارف اتكلم ...اصل تغيير الجو الظاهر
انه جابلي احتباس في الاحبال الصوتية ...
! معلش لو امكن حد يقيم الصلاة
وانا اكيد هصلي معاكم...

# اقم
الصلاة يا ابو جهاد .... الله
اكبر..........

- ابو
بكر الاسيوطي او ابليس الحفيد ظل يحاكيهم في الصلاة وهو يفكر ماذا سيفعل في باقي
المدة... فاذا كانت سبع ساعات فقط في هذه البلدة لكفيلة ان يلاقي فيها كل هذه
المتاعب والاشكال الغريبة..
ماذا
سأفعل في شهر كامل مضطر ان اقضيه هنا حتي ينتهي رمضان ويزول الحظر وابدأ مهمتي
الاولي في اغواء بني البشر...!!!!
سأفعل...
نعم سأكمل وسأحتمل.. فلا مجال للفشل ابدا.
"هكذا
كان القرار النهائي لابوبكر"

#
السلام عليكم ورحمة الله... حرماً يا شيخ ابو بكر

- حرماً
ليه بس... ده انا كنت بصلي والله
معاكم! معملتش حاجه حرام يعني !

# ايه
يا شيخ انا بقول حرما مش حرام !

- معلش
اسف اصلي مرهق جدا من الصبح واللهي ما قعدتش.. خلاص جبت اخري ولازم انام.. الساعه
دلوقتي داخله علي تسعتالاف وخمسمية وعشرين دقيقة ..!

#
ايه...! تسعتلاف ايه ..!!! . عموما هانت
كلها ساعه والعِشا هتِدن وبعدها نصلى حوالى اربع ساعات تراويح وننام ساعة عشان
نصحي للتهجد وقيام الليل وبعدها الفجر وبعدها نجتمع عشان عندنا مهمه في سينا
بكرة.....

-
مهمة... مهمة ايه.. لا لا انا مضطر اسيبكم دلوقتي حالا...

# تسيب
مين يا شيخ.. الداخل بينا ماينفعش يطلع كده بسهولة.. احنا اكلنا عيش وملح وصلينا
مع بعض يعني بقيت مننا .. تعالي معايا
عشان تريح ساعه ونكمل مشوار الجهاد!

- أجِدي
الحقني أجِدي .. انا اتخطفت... رد عليا يا جدي...... ده بيقولك جهاد.... اموت واعرف ازي بيقولو علينا شياطين.. ده احنا
طلعنا غلابة اوي يا جدي..... أجِدى!

ونستكمل
الحلقة القادمة...