إيمي سالم تعلن انفصالها عن غسان المولي

كشفت الممثلة الشابة إيمي عن انفصالها بعد زواج 10 سنوات من الممثل اللبناني غسان المولي. وقد تم الانفصال الرسمي بين الطرفين الثلاثاء الماضي.

وعلقت إيمي علي خبر انفصالها من خلال رسالة كتبتها علي فيسبوك: "أولا أحب اشكر الـ412 Missed call اللى جولى فى خلال ساعتين والـ 1293 message، ثانيا: كنت بفضل خبر انفصالى عن أبو أولادى ما يخدش الحجم الأوفر ده… لا إحنا أول ناس ولا آخر ناس تنفصل.. ومهما كان احنا عشرة عشر سنوات نتج عنها ثلاثة صبيان اللى لسه ما يعرفوش خبر الانفصال فى حين أن الوطن العربى كله عرف وده حاجه مخليانى فى غاية الاستياء. ثالثا: أرجو عدم التحدث فى هذا الموضوع لأن فى مقولة بتقول إن البيوت أسرار.. بس واضح إن المقولة دى عمرها الافتراضى خلص".

واضافت إيمي: "رابعا: مش من حق أى حد يعرف التفاصيل.. لأنها المفروض حاجة شخصية (المفروض)، خامسا: يا ريت الكلام يبقى على قد اللى انا بكتبه وما يخدش حجم أكبر من حجمه لمصلحه الغير.. وما ننساش أن فى اولاد فى يوم من الايام هيقروا اى حاجه هتتكتب عن ابوهم وامهم…فيا ريت نراعى ربنا فى ده، سادسا: سيظل غسان عشره عمرى وحبى الاول وابو حلى ٣ ولاد فياريت لا حد يألف ولا يبتكر سيناريو لسبب الطلاق.. لانه فى الأول وفى الاخر نصيب… ومحدش عارف ربنا كاتب ايه".

وأكملت: "سابعا: السوشيال ميديا نقمتها أكبر من نعمتها.. ويا ريت الناس تستخدمها فى الإطار الصحيح لما صنعت له وليس لضرر الغير، ثامنا: ربنا يهدينى ويهديه عشان خاطر الولاد قبل خاطرنا".