EN 
قالت الفنانة هالة صدقي، إن والدتها كانت شديدة وقوية الشخصية، مضيفة: "كل اصحابى كانوا بيخرجوا وانا مكنتش بخرج ولا ازور اصحابى ولا هما يزرونى، امى كانت قافلة عليا اوى، وخرجت مع اخويا لاول مرة وكنت 15 سنة وبعد انهيار وانتحار"، مشيرة إلى أن والدتها لم تفتح لهم باب المنزل عند عودتهم الساعة 11 منتصف الليل، وقالت لهما "روحوا باتوا من مكان ما جيتوا مفيش حد محترم بيرجع بيته الساعة 11".
وتابعت "هالة صدقى"، خلال استضافتها في برنامج "الستات مبيعرفوش يكدبوا" المذاع عبر فضائية "سى بى سى"، قائلة: "مكنش ينفع اقرأ قصص امى كانت دايما تقوللي ذاكرى وغير كدا كل حاجه صعبة، كانت بتوديني تمارين السباحة بعد عياط كتير"، مضيفة: "وافقت على تمثيلي بعد معاناة وكانت دايما معايا في كل مكان بروحه وهى اللي كانت بترد على كل المخرجين، واللى بيتصل كانت ناقص تاخد الرقم القومي بتاعه".
وأشارت "صدقى": "انا اولادى بيروحوا يزوروا زمايلهم وزمايلهم بيزروهم بس لازم اعرف مين الاب والام اللى ولادي داخلين بيتهم، لكن موافقش خالص انى ولادي يباتوا بره سواء بنت أو ولد".
وأوضحت، أن "مسلسل ليه لا مش مسلسل تمرد على الرجل خالص، ولكن المرأة يجب ألا تحتاج إلى الرجل كشئ أساسي في حياتهم، لازم الست تعتمد على نفسها في حياتها دون أى شخص أخر، كما أنها تعارض شخصية الام في هذا المسلسل التى لم تثق في ابنتها، لانه يجب أن تثق جميع الامهات في اخلاق بناتها والدليل على كدا اننا بنسيب بناتنا تسافر مع اصحابها، البنت الشرقية والمصرية بتتربي وتتعلم كويس اوى".
وأكدت، "انا موافقش ان بنتى تعيش في بيت تانى وهى جمبى هنا في مصر، انا مع ان البنت تعتمد على نفسها وتكون مستقلة بس يكون جوا بيتها مش لازم تتبهدل بره بيتها وبعيد عن أسرتها".
