بعد إصابته بجروح خطيرة.. لبنى ونس والدة يوسف عمر ترد بقوة على محمد رمضان

نشرت الفنانة لبنى ونس، والدة الفنان الشاب يوسف عمر، عبر صفحتها على موقع التواصل الاجتماعى فيسبوك، ردا على محمد رمضان بعد إصابة ابنها فى الإعلان الخاص بالأسطورة.

وقالت لبنى: "إذا عملنا كل حاجة طبيعية وحقيقية كنا هَلَكنا، ولا تُلقوا بأيديكم إلى التهلُكة، يعنى إذا فى مشهد يا أستاذ محمد التمساح بياكلك نترحم عليك ويبقى آخر مشهد فى حياتك، فى مهنتنا يا أستاذ محمد رمضان وأنت وأنا وكلنا عارفين إن ما يسمى بالنجم أستغفر الله العظيم بيتعاملوا معاه فى اللوكيشن كأنه إله هو المِحور والكل يدور حوله، هل ممكن تتعرض لما حدث لابني فى التصوير معاك، مستحيل طبعا بتعمل أكشن وبتبقى عارف قبلها كل تفاصيله مرة واتنين وعشرة واللى عاجبك بتوافق عليه واللى مش عاجبك بتغيره".

وأضافت: "يعنى القنبلة اللى زرعها عصام الوريث لابني تحت منه ومن غير ما يقوله ولا حتى يلبسوا واقي يقدر يعمل معاك كده؟ ليه؟!!!! إنت بني آدم وابني مش بني آدم؟ أنت أغلى الناس عند والدتك ويوسف نن عيني وما فيش أغلى من الضنا، حط ابنك مكان يوسف هاتقول برضه كله فى حبكم يهون بس أرجع واقولك ابني ربنا هايجبله حقه من اللى اسمه عصام الوريث دة اللى ميعرفش أبجديات عمله اللى بيستبيح حياه الشباب عشان يحقق الطبيعية المزعومة الغلط اللى حضرتك بتتكلم عنها حق بني إن شاءالله هايرجعله مش هاسيبه عشان يبطل سي الوريث دة إنه يستهين بحياة الناس، سؤال بقى لما نموت سيادة النجم هايندفن فين؟؟؟؟؟ الديان والعدل والحق موجود واعتمدنا عليك يارب".