EN 
رصد برنامج "تفاصيل"، المُذاع عبر فضائية "صدى البلد 2 " ، تقديم الإعلامية "نهال طايل"، تفاصيل استغاثة زوج "مراتي استغلت غيابي عن البيت وباعت كل العفش على السوشيال ميديا، قائلا: "شوفت الصدمة في إنسانة عملت كل شيء كويس في الدنيا علشان نبنى حياتنا مع بعض".
وروى "مصطفى الزوج"، تفاصيل الواقعة قائلا: "مراتي كانت مطلقة وأنا كنت منفصل، وتعرفنا على بعض عن طريق جروب عبر السوشيال ميديا"، متابعا: "اتجوزت بعد ما انفصلت عن الزيجة الأولى بـ4 أشهر فقط".
وأضاف: "أجرت لوالدتها شقة جنبنا بينها وبينا 300 متر بس، وبعد وفاة زوجها جاءت للعيش معنا"، لافتا: "أصل المشكلة كنا قاعدين يوم عادي بنتفرج على التليفزيون وإحنا بنتعشى وأنا بتكلم مع والدتها وفجأة اتخانقت معايا تقولي أنت مش بتبص لماما وهي بتكلمك.. خطة مرتبة بشكل تقشعر له الأبدان وفي خلال ساعة الدنيا اتقلبت".
وأشار: "كنا الساعة 2 بالليل لقيتها بتقولي أنا همشي، وفجأة لقيت كمية بلطجية طلعت البيت بشكل مبالغ فيه وكانوا مش من سكان العمارة.. ومن يوم 24 ديسمبر يوم حدوث المشكلة وأنا بتلقي رسائل وتهديدات كثيرة ومساومات على القائمة، وقالت لي إديني 50 ألف جنيه وأنا أتنازل على القائمة".
وأوضح: "جالي فجأة رسالة على جروب العمارة أن الشقة اللي كان فيها مشكلة فيه عفش بينزل منها ونقلت كل العفش في بيت والدتها"، مردفا: "البيت بتاعهم بقى عامل زي معرض الموبيليا وفجأة شفت إعلان على صفحتها على السوشيال ميديا أنها عاملة إعلان على صفحتها أنها عارضة العفش للبيع أون لاين، وبتقول زيادة عندهم في البيت".
وأردف: "كانت بتبتعلي صورها وهي جنب العفش وبتطلع لسانها ليا وهي جنب العفش"، لافتا: "مكنش عندي مشكلة في القائمة وكتبتها بـ 135 ألف جنيه ومضيت وأنا شاري.. اتفاجأ أنها تقولي أدفع 50 ألف جنيه وأنا أتنازل عن القائمة".
وأكمل: "أخدوا كل حاجه في الشقه المطبخ واوضة النوم، الشقة كانت على البلاط فعليا، ووقت المعاينة باب الشقة كان مفتوح"، معقبا: "شقايا وتعبي وسهر أيامي من غير نوم ضيعته، ظلم غير طبيعي".
وأشار: "من أول المشكلة دي مفيش راجل من عيلتهم كلمني وقالي حصل أيه ولا حد عرض حل المشكلة، كله ضرب بألفاظ واتهامات برسائل فظيعة.. دمرتني تماما في وسط أهلي وأصدقائي، وحاولت تدمير علاقاتي بكل الناس اللي حواليا وأولهم أمي".
