EN
يعيش الشاب أحمد سعد، البالغ من العمر 30 عاما، في معاناة وألم لا يتوقف منذ ما يقرب من 6 أشهر وحتى الآن، بسبب نسيان طبيب فوطة داخل بطنه أحمد بعد إجراء عملية الزائدة، بالإضافة لإستئصال جزء من الأمعاء الداخلية نتيجة هذه الواقعة، داخل مستشفى جامعي في القاهرة.
وفي فيديو مباشر مع موقع صدى البلد مع الشاب، قال أحمد “ بدأت معاناتي يوم 25 مايو الماضي لما دخلت المستشفى أعمل عملية الزايدة، بعدها وقعت في حمام المستشفى من الألم الغريب رغم إني المفروض أمشي بعد العملية بيومين مسافة بسيطة”
ويعاني الشاب أحمد المقيم بمنطقة عين شمس بالقاهرة، من آلام شديدة بجميع أنحاء جسده وخاصة بطنه، حيث قال: أنا مبعرفش أكل ولا أنام ولا أشتغل ولا أي حاجة ولو كلت باكل حاجة بسيطة عشان بتعب.
وأضاف احمد “ دخلت الحمام في المستشفى وقعت على ضهري من الألم دخلوني العمليات وطلبوا متبرعين دم وبلازما، وقالولي إن في تجمعات دم في المثانة ولازم عملية، وشخصوا الألم إنه ورم في المعدة”
ألم ومضاعفات!
وأضاف احمد "فضلت عايش في ألم ومغص مبيروحش وحياتي كلها وقفت وأمي ومراتي كانوا بيعيطوا لأنهم توقعوا إني هاموت، ولما سألت دكتور خارجي قالي لازم عملية ضروري.
"دخلت المستشفى تاني بعد 3 أسابيع من الألم، عملت عملية بسبب التجمعات الدموية في المثانة، بعدها الألم زاد جدا وموقفش لمدة 3 شهور، ولم رجعت للدكتور الخارجي وعمل أشعة قالي لازم ترجع المستشفى لأنهم في المستشفى نسيوا فوطة في بطنك ومش عايزين يقولولك"
جل من لا يسهو
بعد 3 شهور جالي دكتور بالليل في المستشفى قالي إنت هاتدخل العمليات دلوقتي والمستشفى مقلوب بسببك، إحنا كنا عارفين من الأول إنها فوطة جوا بطنك، بس إحنا مش عايزين مشاكل و “جل من لا يسهو” استعد للعملية"
“دخلت عمليات وخرجت الدكتور قالي طلعنا الفوطة بس استأصلنا 20% من الأمعاء لأن الفوطة أتلفتها”
وتابع أحمد: “بعد عملية خروج الفوطة في دكتور قالي اسأصلنا 60% من الأمعاء مش 20%”
111 يوم بعاني
وقال “ لحد النهاردة أنا بقالي 111 يوم عايش في معاناة وألم رهيب واسهال مزمن ومبقدرش أكل أي حاجة وعايش بحقن مسكنة، كل الفترة دي والألم مبيروحش وأنا مش فاهم ليه ولا عارف أعيش”
ابني مش عارف يعيش!
وقالت والدة أحمد في فيديو صدى البلد “حسبي الله ونعم الوكيل في اللي كانوا سبب في تدمير حياة ابني، إحنا عايشين في كابوس والألم فيا أنا مش فيه، ابني بينزل الفجر ياخد حقن مسكنة عشان يعرف ينام”
احمد يناشد الرئيس
وناشد الرئيس عبد الفتاح السيسي رئيس الجمهورية، ووزارة الصحة، قائلا : أنا غلبان وماشي جنب الحيط، وحياتي اتدمرت وبقيت عايش بالدين والسلف عشان أعرف أصرف على عيالي، اناشدكم البحث عن أي حل لمعاناتي”.
