طبيب الدمرداش: عاملوني كعبد واتحرمت من النوم.. ومش عاوز غير كرامتي

طبيب الدمرداش .. تداول عدد كبير من رواد موقع التواصل الاجتماعي السوشيال ميديا منشور الطبيب محمد الشرقاوي  والذى عرف باسم "طبيب الدمرداش" والمستقيل حديثآ من مستشفي الدمرداش الجامعي التابعة لجامعة عين شمس، إثر تعرضه للظلم أثناء العمل داخل المستشفى الجامعي، وذلك وفقآ لما رواه الطبيب عبر صفحته الرسمية على “فيس بوك”.

طبيب الدمرداش كل اللى عايزه شوية كرامة

وقال الطبيب محمد الشرقاوي"طبيب الدمرداش": (النهارده خلصت إجراءات الاستقالة من جامعة عين شمس وأنا والله لا عايز أبقى معيد ولا مدرس مساعد ولا حتى أستاذ، أنا كل اللى عايزه شوية كرامة وسلام نفسي ومعاملة محترمة، ودي حاجات مش بتتلاقى بسهولة في مستشفيات الجامعة). 

طبيب الدمرداش تقوم بتفضيل من هم أقدم فى التعيين ومفيش رقابة

وأوضح "طبيب الدمرداش"، أن مستشفيات جامعة عين شمس تقوم بتفضيل من هم أقدم فى التعيين حتى وأن كانوا من نفس الدرجة العلمية وتخرجوا فى نفس العام، بالإضافة إلى غياب تام للرقابة والمحاسبة من قبل المستشفي، حيث قال: "الجامعة ماشية بنظام السينيوريتي، يعنى الأكبر منك أو اللى استلم قبلك له أفضلية عليك - وطبيعي جدا أنه يكون فيه شوية مميزات للسينيور - لكن للأسف الشديد اللى بيحصل أثناء محاولة تطبيق المميزات دي أنه السينيور (مش كلهم الحقيقة ) بيكتسب سلطة مطلقة على الجونيور تخليه يقدر يحرمه انه ينام او يروح بيتهم او حتى يروح ياكل، والكلام دا مش مبالغة، وفي غياب المحاسبة بيبتدي الطرف صاحب المميزات والسلطة يمارس ساديته ويطلع عقده على كل اللى تحته، والمشكلة انه كلنا رغم اننا اتحطينا في نفس الظروف واخدنا نفس القدر من التعليم لكن للأسف ما اخدناش نفس القدر من التربية، فبيبقى كل طموحك كطبيب لسه مستلم ( جونيور يعني)  إنك تروح تلاقى السينيور اللى هتقع معاه شخصية متربية ومعندهاش عقد.

طبيب الدمرداش نيابة الجامعة تسببت لى فى مشاكل نفسية

ولفت طبيب الدمرداش، إلى أنه بسبب بعض المشكلات الشخصية فى تعامل من هم أسبق منهم فى التعيين فإن هذا يقوم بعمل ضغط نفسي يؤدي إلى التأثير على العمل حيث أكمل حديثه قائلأ: “نيابة الجامعة للأسف ومع الضغط المستمر بتطلع أسوأ ما فيك، بس هو فيك، علشان كدا يا صديقي النايب حاول تخلي أسوأ ما فيك يكون آدمي و افتكر انه اللى هتعمله دلوقتى هيترد لك بعدين”.

طبيب الدمرداش علشان شهدت بالحق تم اضطهادى

وحكي طبيب الدمرداش عن بعض المشكلات الشخصية التى حدثت داخل المستشفي جعلته يتخذ هذا القرار "خلونى احكيلكم عن شوية مواقف حصلت وكانت دافع أساسي ان الواحد يقرر يسيب المكان دا، الكلام اللي جاي دا طبعا مواقف شخصية، بس اللي حصل معايا بيحصل زيه وأكتر مع زمايلى في باقى الأقسام.

وفد من جامعة الطفل فى زيارة لكلية التربية النوعية بجامعة عين شمس

تالت يوم ليا بعد استلام العمل حصلت خناقة بين دكتورة دفعتي و دكتور تاني أكبر مننا بسنتين، اتفتح تحقيق وطلبوني للشهادة، حكيت اللى حصل، الشهادة دي معجبتش الدكتورة دفعتى ولا عجبت خطيب اختها المدرس المساعد بالقسم و غالبا كمان معجبتش صاحبهم الدكتور السينيور اللى ماسك الوحدة اللى انا فيها، الدكتورة جت اتخانقت معايا و معاها خطيب اختها وبعد ربع ساعة اتصلت بيا من موبايلها بتقولى خد المدرس المساعد عايز يكلمك، وطبعا قالي " انت يا بابا مش عارف انت بتكلم مين، انت يابني انت طريقة كلامك مع الدكتورة زميلتك اللى أكبر منك مش عاجبانى، قولتله يا دكتور هى دفعتى و كانت بتقعد معايا فى مدرج واحد، قالى لا مستلمة قبلك تبقى أكبر منك، وانت تجيلى وتشيل نباطشيات انت فاهم ولا لا " و كلام كتير كله إهانات يعنى، انا بس مستغرب انه دكتورة دفعتى معجبتهاش شهادتي فاتخانقت معايا وجابتلى خطيب اختها اللى فى موقع مسؤولية يكلمنى من موبايلها علشان يدينى كلمتين قدامها 

تاني يوم قالتلى " انت تبقى عارف كويس انت بتكلم مين انت فاهم ولا لا، انا سينيور عليك و دي fact لازم تبقى عارفها كويس، انا ال "كذا و عشرين" على الدفعة و سينيور عليك انت سامع ولا لا " 

قاعدين بنغير على عيان فى كشك الغيار، قعدت تزعق وقالتلى قدام العيان اطلع برااا يلااا برا الكشك، ولما الدكتور السينيور جه على صوت الزعيق قالتله بيتحدانى ومش عايز يطلع بره، قال لها محدش هيطلع بره قالتله يبقى انا مش هغير على العيان وقعدت تكمل زعيق، ودا مش أول عيان تزعق او تتكلم بالاسلوب قدام المرضى وزمايلنا دكاترة الامتياز والتمريض بطريقة كلها تعالي و من قبيل " انت سامع ولا لا، انت فاهم ولا لا، يلا روح اعمل، روح اعمل شغل الامتياز، روح حضر أنبوبة واقف جنب العيان استنانى على ما اجي، مش حتة جونيور زيك اللى يقولى انتي فين، مش واحد زيك اللى هناخد رأيه، انت الصغير وانت اللى تبلغنى ( وهى دفعتي ، بس استلمت قبلى ب ٤ شهور )  .

والفت طبيب الدمرداش انه كان دائمآ ما كانت تهدده حيث قال: انا وهى و الدكتور السينيور صاحبهم اللى اكبر مننا ب ٣ او ٤ دفعات كنا في وحدة واحدة، وحقيقي عمره ما جاب حق ولا خد موقف من اللى بيحصل، بالعكس كان بيساعدها و يقول " هي السينيور، هي المفروض دلوقتى متستخدمش الختم بتاعها، هى المفروض متتواصلش مع دكاترة الامتياز " كانت بتتصل بيا تقولي كلم الامتياز قولهم يعملوا كذا، طب ما تكلميهم انتى, لا هى ما تكلمش الامتياز، لو سمحتى اختمى الورق علشان انا ختمى فى الاستقبال بنحجز بيه عيانين الطوارىء، لأ روح هات ختمك من الاستقبال انا مش هطلع الختم بتاعى، والدكتور السينيور يقول اه هي دفعتك بس سينيور عليك و مش هتطلع ختمها ( والسؤال بس، لما دكتورة دفعتي مش هتطلع ختمها دلوقتى، اومال هتطلعه امتى؟ )
كنت نباطشي اربع وخميس وجمعة والمفروض السبت كمان بس سافرت فجر السبت لطنطا علشان اخلص مشاوير التجنيد وخلصت هناك الساعة ٤ العصر وكنت مستأذن من دكتور محترم فى القسم انه انا مش هحضر نباطشية السبت بتاع وحدته علشان هروح التجنيد، وكان موافق، لقيت الدكتور ( سينيور وحدتى ) بيقولى لا تعالى مفيش حاجه اسمها مستأذن منه، قولتله انا على ما اوصل هتبقى الساعه ٩ بالليل قالى برده تيجى علشان تخلص الأحوال (اللى هي أصلا بتبقى آخرها الساعة ٢ العصر)، روحت ملقيتش طبعا احوال ولا حاجه ولقيته بيدينى ورقة فيها ٦ أسماء عيانين بيقولى كلمهم علشان يتحجزوا، دورت على البوكليت ( والبوكليت دا عبارة عن كشكول فيه ارقام العيانين واساميهم وتشخيصهم وكل وحدة معاها بوكليت خاص بيها) ملقيتهوش فكتبت على الجروب اسأل عليه، لقيته بيتصل بيا وبيقولى " الأصل فى وحدتنا مش البوكليت، والبوكليت دا extra effort من الدكتورة و هى خدته ومش هتجيبه الوحدة تاني وانا شايف انه دا من حقها "، قولتله طب انا هكلم العيانين ازاى، قالى دور بقى فى الشيتات والأشعات بتاعتهم على ارقامهم او ابقى اعمل لنفسك بوكليت!

طبيب الدمرداش اشتكيت واستنيت حد يجيب لي حق أو ياخد موقف و محصلش 

واختتم حديثة قائلآ أنه كان دائمآ ما يقوم بالشكوى لكن لم يحصل على أى مساندة أو رد تأتى له بحقه حيث ورد فى حديثه:  والله يا جماعة فيه مواقف أكتر، بس مش عارف احكيها، و اشتكيت واستنيت حد يجيب لي حق أو ياخد موقف، بس محصلش، والحقيقة مفيش أي بطولة فى التواجد في بيئة زي دي، والواحد هيكون بيحرق في الفاضي فعلا لو كمل وما اعتزلش ما يؤذيه.
نيابة الجامعة فترة صعبة ومرهقة اصلا فمش مستاهلة نضيف عليها قرف التعامل المهين، انا كل دا ما اشتكيتش من ضغط الشغل، كل دي حاجات اضافية فوق ضغط الشغل وبهدلة نيابة الجامعة وقرفها، كل اللى كنت عاوزه بس تعامل كويس، وانه لو غلطت الاقى حد يفهمنى بالراحة، مش حد متحفز ومستنيني اغلط .