هلا رشدي تعود إلى منزلها بعد نجاح عملية الغضروف... وتكشف طبيعة مرضها

كشفت الفنانة هلا رشدي عن التفاصيل المتعلقة بمرضها، ومكوثها في المستشفى خلال الأيام الماضية بعدما نشرت صورة لها قبل دخولها غرفة العمليات منذ أيام. 

ونشرت هلا رشدي صورة لأصدقائها من داخل المستشفى وعلقت عليها قائلة: "شكراً لكل الحبايب اللي ربنا طبطب عليا بيهم الفتره اللي فاتت، من يوم العمليه اللي كان عامل زي الزفه في المستشفى وأنا بابتسامتي المُعتاده بقاوم الألم وأنا في قمة السعاده والرضا، وبعدها عطايا ربانيه وليالي ملاح مليئة بالحب والدعم النفسي والمعنوي والمورفين.. من كل قلبي بحبكم وزادت غلاوتكم في قلبي وعرفت قيمتي عندكم".

وأوضحت هلا رشدي طبيعة مرضها قائلة:" الحكايه باختصار هُمَّه كانوا ١٣ يوم من أصعب أيام حياتي من غير نوم وبـ أنين بيقطع في قلبي وجسمي ومفيش على لساني غير كلمة يا رب بكل اشكالها من قرآن وذكر بسبب آلام مزمنه متواصله زي النار القايده في ظهري و رجلي الشمال اللي فشلت كل المسكنات في تسكينها، ده انا ضربت تيمو يا أخي.. والأدهى والأمَر إني كنت بره مصر ومش عارفه أرجع لأسباب لها علاقه بالإجراءات.. وما صبَّرنيش فيهم إلَّا وَنَسي بالله والسكينه اللي ملأ بيها قلبي وهوه بيطمني بكلمتين واسى بيها روحي "فَصَبرٌ جميل"..ورجعت مصر واكتشفنا في الرنين المغناطيسي إن في غضروف انفجر ونزل على عصب رجلي الشمال".

ووصفت هلا رشدي وضعها الصحي قائلة: "كانت عمليه طويله وصعبه لكن بفضل الله ثم بدعواتكم تمت العمليه بنجاح الحمد لله وفتحت صفحه جديده مع نفسي وروحي وكانت من أجمل المكافآت🤍 ونوَّر بصيرتي و شوفت كل حاجه على حقيقتها واكتشفت قد ايه الانسان ضعيف وان الدنيا في لحظه تخلص على اهون سبب فمش مستاهله الدوشه والتفاصيل ديه كلها.. أنا رجعت البيت الحمد لله ومن النهارده بدأت رحلة العلاج بالمكوث شهر في المنزل مستلقية على ظهري عشان كل حاجه ترجع لنصابها الطبيعي ان شاء الله.. أرجوكم أحمدوا الله على نعمة الصحه وادعوا يديم عليكم الستر والصحة والعافية.. لا أراكم الله مكروه فيكم ولا في ذويكم".