EN 
حرصت الفنانة لقاء الخميسي على دعم احمد يحيى حارس مرمى فريق الاتحاد السكندري عقب مغادرته للملعب باكيا أثناء مباراة الفريقين بسبب هجوم الجماهير عليه .
ونشرت لقاء الخميسي رسالة دعم عبر حسابها الخاص بموقع التواصل الاجتماعي “ فيس بوك قائلة : الحقيقة ان الواحد ساكت بقاله سنين بس اللي حصل انهارده لا يسكت عليه ،الاخلاق راحت فين ؟! الإنسانية راحت فين ؟ ايه بجد اللي حصل للناس ؟،مشهد بائس ومخيف ولا يمت للإنسانية بصلة .
و تابعت : احمد يحي حارس مرمى الاتحاد السكندري .. حارس مرمى مثابر ومجتهد وانسان خلوق وشاب في بدايات مستقبله ، اتوفى اخوه من يومين ونزل الملعب ولعب ووقف وصد وعمل اللي عليه كله والاخطاء ماتخصوش وحتى لو تخصو ودا مش حاصل !
و استكملت : ليه الاهانات ليه الشتيمة ليه التعدي بألفاظ خارجة ليه كل دا .. ياعالم دي رياضة رياضة مش خناقة ما بين بلطجية ، دى متعة مش تعنيف! ايه بقى امتى هاتفهم ان لاعب الكره بني ادم بيؤدي شغله وبيحس وبيحلم وعنده اهل بيزعلو اما بيتهان وهما يتهانو معاه وعنده ام بتزعل وزوجة بتتجرح على جرحة .
و اختتمت حديثها : كفاية بقى كفاية تكرهو الناس في عيشتهم وشغلهم اللي بيبذلو فيه مجهود وبيحبوه،ماحدش ليه حق مطلق في الشتيمة والاهانة .. أي حد بيشتم هل يقبل انه يتشتم ويتهان !!! هل تقبل دا عليك وعلى اهل بيتك،اتقوا الله بقى اتقوا الله".
شهدت مباراة الاتحاد وسيراميكا كليوباترا لقطة مؤثرة لأحمد يحيى حارس مرمى الاتحاد والذي تلقت شباكه 5 أهداف قبل أن يخرج في الدقيقة 80 بسبب الجماهير التي هاجمته بقوة واتهمته بأنه تسبب في خسارة فريقه اليوم وأن جميع الأهداف كانت بسببه.
وقرر عماد النحاس المدير الفني للفريق السكندري خروج أحمد يحيى من المباراة ونزول الحارس البديل صبحي سليمان الحارس الناشئ بسبب هجوم الجماهير وعدم قدرة يحيى على استكمال المباراة خاصة وأن اليوم شقيقه توفى، وشهدت المباراة دقيقة حداد على رحيل شقيقه.
وخرج أحمد يحيى بالدموع بسبب ما تعرض له وأسرع إلى غرفة اللاعبين ولكن قابله عماد النحاس وأحمد ناجي مدرب حراس سيراميكا من أجل الشد من أزره والوقوف بجواره.
وفاز الفريق الأول لكرة القدم بنادي سيراميكا كليوباترا نظيره الاتحاد السكندري بخمسة أهداف دون رد فى المباراة التى جمعت بينهما على استاد المقاولون العرب في إطار مباريات الجولة الرابعة والعشرين من الدوري المصري الممتاز.
الفوز رفع رصيد سيراميكا إلى 29 نقطة في المركز التاسع بينما تجمد رصيد الاتحاد السكندري عند 28 نقطة في المركز العاشر.
