الإشراف العام
إلهام أبو الفتح
رئيس التحرير
أحمــد صبـري
الإشراف العام
إلهام أبو الفتح
رئيس التحرير
أحمــد صبـري

بعد اتهام المدرسين بالتقصير في الإشراف ..

عشان ماحدش يموت في المدرسة| رسالة مؤثرة من معلمة للأهالي: نعاني يوميا

صورة ارشيفية
صورة ارشيفية

انتشرت رسالة على موقع التواصل الاجتماعي فيسبوك، من معلمة، تحكي معاناتها اليومية في التعامل مع الطلاب داخل المدرسة طوال العام الدراسي؛ وذلك ردا على حملة اتهام المعلمين بالإهمال في الإشراف داخل المدارس، بعد وقوع عدة حوادث مؤخرا.

وجاء نص رسالة المعلمة التي تم تداولها على فيسبوك كما يلي : 

لكل ولي أمر في البلد دي  ، احنا مبقناش بندخل المدرسة عشان نعلم ونفيد ، احنا بقينا عايشين في محاولة مستميتة من الساعة 7 لحد الساعة 2 للبقاء على أبناء سعادتكم أحياء .. ليه ؟؟ ، عشان بكل بساطة 90٪؜ من عيالكم ناقصين تربية وأخلاق إلا من رحم ربي

طول النهار بنسمع في ألفاظ بيئة وبنشوف سلوكيات بلطجة 

وكل ولي أمر لما ابنه يشتكي تلاقيه جايب ابنه في إيده وجاي يحاسب المعلم أمام ابنه؛ تأديبا للمعلم واكراما لإبنه

ربوا عيالكم الأول وبعدها اللي يدوسلهم على طرف يبقى ساعتها حقكم تطحنوه ، احنا عايشين طول النهار “بنجري ورا ده وبنسلك ده من ده”

أنا عايشة في المدرسة ما بين اني الحق عيل يكون باصص من الخامس لو لمسه طفل هينزل قتيل من فوق ، أو عيل بينادي من الخامس ونص جسمه برا على زميله اللي ف الملعب تحت ، هتقوليلي وفين المدرس اللي عليه ، هقولك ده عيل من ضمن 1000 عيل في أثناء الحصة يقول عايز أروح التواليت ، المدرس اللي عليه وقتها بيكون أمام ثلاث اختيارات أحلاهم مر : إما يمسك إبن سعادتك ويسيب فصله ويروح يوديه الحمام بنفسه عشان يضمن إنه ميلفش الخمس أدوار أو يقع من فوق وساعتها هيسيب الخمسين عيل يطحنوا بعض وممكن عيل يعور زميله عادي بكل بساطة وهو ( بيهزر) وساعتها هيتسجن ، أو يسيبه يروح لوحده والواد ياخد الأدوار كلها لف ويتزحلق ع السلم فينزل مكسور أو ميت وبرضو ساعتها يتسجن ، أو يمنعه من دخول الحمام في حصته فيعمل حمام على روحه وبرضو ساعتها هياخد جزا أو يتسجن.

مش عارفين نعاقب اللي بيغلط عشان الغلط ميتكررش بشكل أكبر ، عشان ولي الأمر ميجيش ينفش نفسه علينا ، ولا عارفين نسكت لأننا لو سكتنا والله ما هنحكم المدرسة وهيحصل كل يوم قتيل فيها.

99 ٪؜ من المعلمين دلوقتي لا يشغلهم ابنك يتربى ولا يفلح ، كلنا بقينا بنحاول نحافظ على نفسنا وفـ 60 داهية أخلاق ابنك ومستواه ، كلنا بنحاول من أول اليوم نحمي عيالكم من شرور بعض لحد ما يروحولكم بنفس عدد الصوابع والعنين لم يصيبهم خدش ، واللي بيفلت من استطاعتنا يبقى قدره وقدرنا.

احنا في مدرستنا 13 معلم بيحاولوا يسيطروا على 1000 طالب منهم 900 غير أسوياء بالمرة.

أنا في المدرسة دي معلمة وأم، ويشهد الله لو بنتي بصت لزميلتها بصة مش لطيفة؛ بعاقبها وبخليها تعتذر لزميلتها، أنا بدخل الفصل وقدام الفصل كله بقول للمعلم: خديجة لو غلطت؛ عاقب وماترجعليش قبلها.

وأقول لكل معلم : اعمل اللي يرضي ربنا ويحميك ويحمي العيال دي ، احنا والله السنة بتعدي بستر ربنا فقط ، ومش طالبين منكم كتير ، طالبين منكم تربوهم عشان نفوق ونعلمهم، ربوهم عشان محدش هيشيل الهم غيركم في الآخر ، ربوهم عشان ميأذوش غيرهم ولا يجيبوا الأذى لنفسهم ، أنا نفسيا تعبت من حوادث المدارس والله

احنا والله كلنا بقينا بنفكر جديا ناخد أجازات ونحمي نفسنا من مصايب عيالكم لأن احنا كمان ورانا عيال عايزة تتربى.

رسالة مؤثرة من معلمة للأهالي
رسالة مؤثرة من معلمة للأهالي
رسالة مؤثرة من معلمة للأهالي
رسالة مؤثرة من معلمة للأهالي