EN
وجه الإعلامي تامر أمين، رسالة اعتذار لـ محمود عبدالرازق شيكابالا قائد فريق الكرة الأول السابق بنادي الزمالك، بسبب انتقاده له قبل اعتزاله كرة القدم.
وقال تامر أمين خلال برنامجه «آخر النهار»: «على مدار سنوات طويلة ياما انتقدت شيكابالا لما كان بيلعب، وبالتأكيد مفيش مجنون هينتقد مهارته وحرفنته، وأي عاقل هيبقى عارف إنه أسطورة للحرفنه وخليط من المهارة والحلاوة والمزيكا».
وأضاف: «شايف إن شيكابالا مخدش حقه في كمان، ولو ركز في اللعب والملعب كان هيتخطى حدود العالمية، فانتقادي له مكنش كورة إنما بسبب سلوكه في الملعب والاشتباكات اللي بتحصل بينه وبين الجماهير، ومع انفعالاته وعصبيته وخروجه في بعض الأحيان عن النص».
وتابع: «حصل التحول بعد ما اعتزل شيكابالا كرة القدم، وأصبح محلل وضيف بالبرامج وبيطلع بشكل أسبوعي، ولما ابتديت اتفرج عليه واسمعه واعرفه، لقيت إنه اكتشاف جديد».
وواصل: «شيكابالا الذي لم أكن أعرفه، تقريبًا ظهر عكس اللي كنت بقول عليه، بيظهر هادي وحكيم ورزين ودمه خفيف وروحه حلوه ومحب للجميع، والأهم من ده إنه موضوعي وحيادي، وبالنسبالي كان اكتشاف مفرح».
واختتم تامر أمين حديثه قائلًا: «كلامه فيه منطق وحيادية ومفيش أي نوع من أنواع العصبية ولا الاحتقان، عشان كدة سموها اعتذار مني، وهو تحول عندي من موهبة أسطورية في الملاعب، والآن نجم في المشهد الرياضي يتسمعله ويتحب، اللي ما يعرفك يجهلك».
