EN 
أجابت الفنانة صابرين عن سؤال الإعلامية لميس الحديدي حول ما مرت به في حياتها من ارتداء الحجاب ثم خلعه واستبداله بالباروكة ثم العودة لشعرها، قائلة: “صابرين كانت بتعيش كل لحظة بصدق وده طبيعي كل ما بنكبر بنعيش لحظات معينة بصدق زي قصة حب عشتها”.
وقالت صابرين في حوارها مع الإعلامية لميس الحديدي في برنامج " كلمة أخيرة " على شاشة "ON" قائلة :" لما لبست الحجاب لبسته عن إيمان شديد وكنت في لحظات "لخبطة" وخاصة بعد مسلسل أم كلثوم حصل نجاح كبير".
وأكملت: "فيه أقنعة كثيرة اتشالت وسقطت بعد المسلسل من زملاء الفن بعضهم كانوا بيحبوني عشان حبوبة ولطيفة وبعدين فوجئت بالأقنعة دي بتسقط وقلت وقتها أنا إيه ده ؟ إيه الي بيحصل ده ؟ بإسم المنافسة انا مش بتاعت كده خالص .. أنا واحدة بمشي جمب الحيط".
وتابعت صابرين: " جتلي حالة عزوف وقتها وكان عندي انفصال ولخبطة خلتني أقعد في البيت لكن عن إيمان وإن الواحد بيحب يعمل اللي عايزه بصدق".
تابعت : " لما قررت خلع الحجاب مجدداً حسيت إن ده مش صح أوي ولا اللي قبله كان صح برضه أوي وسألت نفسي ليه أكون بثلاث وشوش أو بوشين ؟!"
ارتداء الباروكة
وردت على انتقادات الهجوم عليها وقت ارتداء الباروكة قائلة : " قلت لنفسي مع الهجوم والانتقادات وتعليق الشماعات ؟ ليه أخلي الباب موارب زي كده، وسألت نفسي ليه هكسب العالم واخسر نفسي مش صح لازم أكسب نفسي ولقيت نفسي حابة نفسي دلوقتي أكتر وشكلي مش "فيك" فيه تصالح ورضا".
وتابعت صابرين:" العلاقة بيني وبين ربنا حاجة خاصة جداً دي علاقة في السر وهي أسمى العلاقات ".
ووجهت رسالة لمنتقدي خلع الحجاب قائلة : " الي هينزل معايا القبر يحاسبني .. فيه ناس بتدخل على السوشيال ميديا يوجهولي رسائل من نوعية : بحبك في الله وانا بتقبل ده لكن فيه شريحة تانية شغالة بهدلة وتهزيء ودول لجان ".
