أحمد عز عن مواصفات شريكة حياته: لازم تكون ذكية| نوستالجيا

حل الفنان أحمد عز، في لقاء تلفزيوني قديم من تقديم الإعلامي عمرو الليثي والمُذاع على فضائية دريم ،وكشف خلال حواره عن مواصفات شريكة حياته و حقيقة الشائعات حول ارتباطه.

وأجاب الفنان أحمد عز عن سؤال " ممكن تتجوز بشكل تقليدي ؟" قائلًا :" لاء انا لازم احب عشان أعرف أتجوز ".

وقال أحمد عز عن مفهوم الجمال بالنسبة له  :" أنا مفهوم الجمال بالنسبالي الذكاء لأن الست الذكية هتعرف تهتم بنفسها وتدير حياتنا بشكل صح "، متابعًا :" الست عمود البيت وده اللي أنا شوفته في بيت أهله ".

وتابع "عز" :" مش هنكر إن أنا بدور على واحدة تشبه والدتي أو تكون في مواصفاتها ولكن ده مستحيل لأن الدنيا بتختلف بس لو فضلت افكر كده مش هتجوز ".

وأكمل ، أن ظروف عمله تختلف عن أي شخص أخر وذلك بسبب عدم استقرار الدخل والعمل ، معقبًا:" عشان كده لازم تكون إلي هرتبط بيها ذكية جدًا وواقفة في ضهري وتستوعب ظروفي ".

وأضاف :" أنا أكتر واحد طلع عليه إشاعات في الدنيا "، مستطردًا :" معنديش مشكلة إن الصحفي يكتب بعمل ايه أو بروح فين أو اي تفاصيل تانية بس من غير أكاذيب ".

وأضاف :" أنا عايز يكون عندي أولاد وأسرة انهاردة قبل بكرة واتمنى ان انا اعمل ده "، متابعًا :" اتمنى اعمل ده مع حد بحبه واعيش معاه بقية عمري ".