EN 
تحدّث عبدالله دسوقي عن مشروعه الألف رسام، قائلاً:"مش لازم تكون متخرج من كلية فنون جميلة عشان ترسم، وجالي فكرة مشروع الألف رسام، إني أعلم ألف واحد الرسم في خلال سنة".
وأضاف عبدالله الدسوقي خلال مداخلة هاتفية مع برنامج "صباحك مصري" المذاع على فضائية "mbc masr"، قائلاً:" الموضوع كان بالنسبالي مستحيل، لأن أنا لسه ببدأ طريقي في أني أرسم، وعايز أعلم الناس الرسم و هما مكنوش بيرسموا قبل كده".
وتابع:" و بدأت أعلم الناس في مناطق مختلفة في القاهرة، وبعد كده من القاهرة بقيت أسافر محافظات، واشتركت مع محافظة البحر الأحمر في ورشة فنية ، ونالت إعجاب الجميع".
وأوضح صاحب مبادرة "مشروع الألف رسام"، قائلاً:"بدأت أجيب كتب طلبة فنون جميلة وأذاكرها، وكنت بجيب كتب أجنبية وأترجمها ، وأشوف الفنانين اللي بدأوا علم الفن، كانوا بيفكروا إزاي، وأتبع منهج التفكير بتاعهم".
وأكمل:"الرسم مبني على شوية قواعد أساسية، بحاول أستوعبها كلها وأوصلها لكل عمر على حسب استيعابه، يعني الطفل الصغير مش زي الكبير، فإزاي توصله مبدأ بطريقة بسيطة جداً و يفهمها وينبهر بيها، ده كان بيأخد مجهود في تحضير المادة العلمية".
