EN 
أكد الإعلامي أحمد شوبير على أن الإنجليزي مارك كلاتنبيرج لا يسير بصورة جيدة في إدارة ملف التحكيم في مصر حتى الآن.
وقال أحمد شوبير عبر برنامجه الإذاعي : «إمبارح اتحاد الكرة اعتمد تشكيل لجنة الحكام الجديدة والحقيقة في حاجات أنا مش فاهمها لو فيه حد فاهم ياريت يفهمها لي، لكن واضح إن كلاتنبيرج مش عارف يسوق».
وأوضح شوبير :«كلاتنبيرج اشتغل شوية بأحمد أبوالعلا وبعدين مشي مسكوه شغل إداري بعد ما كان سكرتير اللجنة، وكنا متوقعين إن كابتن توفيق السيد يكون سكرتير اللجنة لكنه بقه مسؤول عن تعيينات الحكام في الدوري الممتاز، وخلوا محمد فاروق وتامر دري مسؤولين عن التعيينات في دوري القسم الثاني وهيام بركة مسؤولة عن تعيينات الكرة النسائية ومسؤول عن تعيينات حكام الفار واحد اسمه جاكوب كولين ودي أول مرة أعرف أن كلاتنبيرج له مساعد».
وأضاف شوبير: «هقول لكم خبر النهارده قد يشهد استقالة 2 من أعضاء اللجنة وهما محمد فاروق وتامر دري، ليه بقه؟ عشان الاثنين لغاية أول امبارح كانوا المهيمنين على اللجنة هما اللي بيحطوا الحكام والفار وهما اللي بيقيموا وهما كل حاجة، ولما خلاهم في الدرجة الثانية قالوا نمشي بكرامتنا أحسن».
وتابع شوبير: «هقول لك مفاجأة مدوية كمان الحكم محمد الحنفي من ساعة مباراة الأهلي وغزل المحلة موقوف، واتلعب الفترة اللي فاتت الأسابيع: السادس والسابع والثامن والتاسع من غيره واتحط اسمه في العاشر واتشال.. كمان محمد الصباحي ومحمود عاشور كانوا محطوطين في مباريات وشالوهم وحطوهم في الفار مش هيحكموا في الملعب».
وأردف شوبير: «لما استفسر الصباحي من كلاتنبيرج فقال له انا كنت متخيل إن وزنك زيادة بس أنت واقف قدامي مفيش زيادة أنا كنت ظالمك».
واختتم شوبير: «طيب ولغاية امتى.. لما جه كلاتنبيرج فرحنا جدا ولما الراجل حط ايده وظبط شوية حاجات قولنا يا مسهل يارب، لكن من وجهة نظري كلاتنبيرج عنده مشكلتين، الأولى سفره لكاس العالم في ظل لعب بطولة الدوري فحصل مشاكل وكان في النهاية عندنا أزمة، والمشكلة الثانية هي عدم ثقته في معاونيه».
