EN 
نشرت والدة الطفلة يمنى، منشورا من خلال حسابها الشخصي على موقع التواصل الاجتماعي فيسبوك.
وقالت والدة يمنى: أنا أم الشهيدة يُمنى.. نقيت اسمها تنقاية حبيت اسمها كتيير .. أنا حملت فيها وخوفت عليها بالشهر التاسع حكولي المياه نقصت عنها واحتمال تموت، جريت عالمستشفى وعيطت بدي أنقذها وولدت قيصري .
وتابعت: بس ولدتها حكتلهم هي عايشة فيها اشي حكولي هي بخير، بس طلعت حطيتها بحضني ما حسيت لسه باشي كان شعور غريب، بعد اسبوعين تحملت مسؤوليتها نيمها أبوها بينا، كانت هي طفلة غريبة تنام على بطنها صحتني من النوم وهي بتمص اصابعها جعانة،
أول مرة أحس بالأمومة نسيت وجعي حضنتها وقعدت أرضعها، ومن وقتها بحبها كتير.
وأضافت : أخدت إبرة الشهرين نمت جنبها من كتر ما هي بتعيط وصرت أعيط جنبها كنت أتوجع عوجعها ، يوم الحرب ١٠/٧ ابرة الـ٤ شهور حكتلها الله مش حابب تتوجعي يا ماما اجلوها الك.
واسترسلت: يمنى كبرت صارت ٥ شهور فرحت عشان صرت أعملها بسكوت وحليب وكوسا وجزر وبطاطا، ولما حكوا حرب هربت فيها بكل مكان وانزل من الطابق الـ١١ عالدرج وبس انزل ألاقي الناس بتهجم بدهياها وانا اعطيها الهم عشان انا لو مت هي تعيش .
ونوهت : يوم ما راحت مني كان كابوس كنت محمماها وملبساها ابيض ورشتلها ريحتها ورضعتها واكلتها بسكوت بحليب بعرفش اني بحضرها للموت.
وأوضحت: هادي يمنى نور عيني فرحة قلبي شو ما احكي، قليييييييل النار الي بقلبي ما بتنطفي نمت جنبها يوم ما استشهدت بالشفا حكتلها هيني يا ماما ما سبتك تنامي بمكان انا مش فيه.. اللهم اجرني بمصيبتي خيراً .. يارب صبرني صبرني .. بنتي عصفورة شهيدة، حسبي الله ونعم الوكيل.
