إيناس حمدي تكتب: أغنيات هابطة في الحضانة

الحكايه ومافيها.. النهارده ابني رجع من الحضانه واحنا طالعين على السلم لقيته بيغني بيقول النهارده فرحي يا جدعان. وبعدها بشويه لقيته بيقول قلعته ولبسته..فقلت له جبت الكلام ده منين ..قال لي عمو.. قلت عمو مين..اتضح ان سواق العربيه اللي بيجيبه ويوديه من الحضانه بيغني للعيال..وعايزة أسألكم.. اعمل ايه ولحد فين وخدانا الاغاني دي. وازاي اقدر اسيطر على الناس اللي بره. ومايلقوه على مسامع اطفالي من كلام معرفش بيوصل لحد فين.انا مره كنت ماشيه في الشارع فلقيت عيال في ابتدائي مروحين وبيشتموا بعض بالفاظ صعقت لها. وبجد وقتها فكرت ابني هيحتك بعيال زي دي هيسمع الكلام ده .طيب احميه ازاي؟ اقفل عليه الباب ..اسد ودانه؟ اعاقبه ؟ اعمل ايه وانا لما بقوله عيب بيبصلي باستغراب وهو طفل عمره ثلاث سنوات ونصف .ويقولي انا اسف يا ماما مكنش قصدي.
منقول عن موقع محاورات المصريين